[A:211]shes rab kyis yang dang yang du tshig don thams cad la zhib par dpyad cing / don dang don ma yin pa rnams so sor phyes te som nyi'i 'ching ba mtha' dag las rnam par grol bar mdzad pa yin no/ /sgom pas nyams su bzhes pa'i tshul yang / spyir bsams byung gi shes rab kyis sgro 'dogs bcad cing gtan la phab pa rnams dus dang rnam pa kun tu brtson pa rgyun chags pa'i sgom pas nyams su bzhes pa dang / bye brag yi dam lha'i bsnyen sgrub kyi rim pa'ang gong du smos pa rnams dang / gzhan yang khams bod kun tu snga phyir bstan pa dang sems can gyi don rlabs po che mdzad pa'i skabs gseng rnams su rje btsun rdo rje rnal 'byor ma dang / dpal rdo rje nag po chen po gur gyi mgon po brag rdzong ma dang / dpal mgon zhal dang / shin tu zab pa'i dbyangs can ma dmar mo gsang sgrub dang / paNDi ta sa manta shrI'i lugs kyi dbyangs can ma dkar mo bcas kyi sku mtshams rnams bsnyen tshad tshang ba lan kha yar bzhugs shing / sku mtshams kyi skabs tsam du ma zad dus rgyun du'ang yi dam gyi lha mang po'i bskyed pa'i rim pa dang / rdzogs pa'i rim pa mtshan bcas mtshan med kyi rnal 'byor dang / sngags bzla ba dang / gtor ma 'bul ba la sogs pa dang / rjes spyod kun tu'ang snang grag dran rtog thams cad lha sngags ye shes kyi rol par shar pa'i sgo nas mdor na tha mal gyi rnam par rtog pa skad cig tsam yang skye ba'i skabs mi rnyed pa yin no/ /shes bya'i chu gter ma brgal bar/ /kun mkhyen nor bu rnyed min te/ /de phyir rgyal dang sras rnams kyis/ /thos bsam sgom pa'i tshul rnams bstan/ /de yang thog mar thos pa yi/ /sa bon legs par btab byas na/ /slad nas bsam sgom las byung ba'i/ /shes rab me tog bkra bar 'gyur/ /gzod nas so so yang dag pa'i/ /rig pa mchog la dbang bsgyur yang / /'gro