[A:212]rnams yongs su bkri ba'i slad/ /tshul 'dir rang nyid 'jug bzhed nas/ /mkhyen brtse nus pa'i yon tan gyi/ /gzi 'od phyogs brgyar 'phros pa yis/ /srid zhi'i mun pa kun sel ba/ /smra ba'i dbang phyug che rnams las/ /zab pa dang ni rgya che ba'i/ /chos kyi bdud rtsi legs blangs pas/ /ma rig pa ni rig pa dang / /mun pa'ang snang ba'i go sar bkod/ /de don bsam pa'i shes rab kyis/ /yang dang yang du dpyad pa'i mod/ /ngang pas chu las 'o ma ltar/ /ma nor don gyi ro mchog myangs/ /de nyid tshul bzhin bsgoms pa dang / /yi dam lha yi bsnyen sgrub kyis/ /spang bya'i 'khor bar grags pa yang / /bsgrub bya'i sangs rgyas nyid du bsgyur// //spyi don bzhi pa phrin las kyi gtso bo bstan pa dang sems can gyi don rlabs po che ji ltar mdzad pa'i tshul la gsum ste/ dpal e wa~M chos ldan gyi chos kyi rgyal srid chen por mnga' gsol te bstan 'gro'i don ji ltar mdzad pa'i tshul/ mdo khams su mi bdag sa'i tshangs pa chen pos spyan drangs te bstan pa dang sems can gyi don ji ltar mdzad pa'i tshul/ slar yang rang gnas gdan sa chen por zhabs pad bkod de bstan 'gro'i don ji ltar mdzad pa'i tshul lo/ /de'i dang po ni/ nges pa don gyi thams cad mkhyen pa 'jam dbyangs mkhyen brtse'i dbang po'i zhal snga nas mdzad pa'i rnam thar gsol 'debs las/ rgyal bas lung bstan kun mkhyen e wa~M pa'i/ /chos kyi khri la bgrang bya bcu phrag bar/ /ngo mtshar mkhas pa'i bgyi bas thub pa'i bstan/ /nyin bzhin gsal bar mdzad la gsol ba 'debs/ /zhes gsungs pa ltar gyi don zhib tu bshad pa la gnyis te/ thog mar dpal e wa~M chos ldan gyi chos kyi rgyal srid chen por mnga' gsol ba'i tshul dang / de nas bstan pa dang sems can gyi don ji ltar mdzad pa'i tshul