[A:214]snang du 'dra sku de nyid yar bzhengs te/ rje 'di'i snyan dar phul ba rnams phyag gis bzhes pa'i snang ba byung zhing / de'i rkyen gyis bde gsal mi rtog pa'i nyams bsam gyis mi khyab pa thugs rgyud la 'khrungs shing / de nas lha khang 'ga' zhig mjal bar mdzad kyang / bde ba chen po'i nyams skyes drags pas rjes sor bsam blo gtong dus mi dran par 'dug gsungs shing / 'di ni e wa~M pa'i chos kyi rgyal srid chen po 'dzin dgos pa'i ltas dang / bzung nas kyang bstan pa dang sems can la phan pa cung zad tsam 'byung ba'i ltas yin pa 'dra gsungs mod/ dag snang 'di ni so so skye bo'i blo yi spyod yul du ma gyur pa'i ngo mtshar shin tu che ba zhig go /de rjes hor zla brgyad pa'i mjug tsam na mkhas dang grub pa yongs kyi gtsug rgyan e wa~M pa'i mkhan chen khri thog pa byams pa bsod nams dpal 'byor pa phran bu'i spyan 'bras gsal min du gyur pa dang / de'i mchod dpon mkhyen pa'i spyan ras gsal ba zhig yod pa de'ang glo bur du lnga pa'i lam du song ba sogs kyi rgyu rkyen 'ga' zhig la brten nas e wa~M pa'i bla khag khang tshan rnams dang / dpal sa skya pa'i 'jam mgon khri chen rin po che rnams su shin tu nan tan chen pos bla brang dgongs khrol zhu bar mdzad pa na/ de dag nas kyang rim gyis dgongs pa khrol bar gyur la/ de nas e wa~M pa'i bla khag khang tshan dang bcas pa thams cad kyis da ni rang re rnams kyi mgon dang skyabs dang dpung gnyen dam par bstan pa'i snang byed chen po zhig chos kyi rgyal srid 'dir mnga' gsol bar 'os so zhes gleng ba na/ thams cad kyi blo mthun par yongs rdzogs bstan pa'i snang byed mtshungs pa med pa'i rje 'di dang / rgyud sde rgya mtsho'i mnga' bdag khang gsar zhabs drung rin po che ngag dbang blo gros bzang po pa dang / nyams dang rtogs pa'i dbang phyug phan khang zhabs drung rin po che dpal ldan