[A:215]rin chen chos mdzod pa ste gsum mkhan por 'os shing / de'i nang nas kyang spangs pa dang rtogs pa'i yon tan gang la gzhig kyang rje 'di kho na bstan pa'i bdag po chen por mnga' gsol ba zhig byung na phan bde'i nyi ma gsar du 'char bar 'gyur ro zhes gleng bar byed cing gnas tshul de bzhin dpal sa skya'i khri chen thams cad mkhyen pa ngag dbang kun dga' bkra shis mthu stobs bstan 'dzin bzang po'i gser snyan rin po cher gsol ba na/ spyir dus gsum gzigs pa rnams kyis mi mkhyen pa'am/ mi gzigs pa'am/ thugs su mi chud pa ni ci'ang srid pa ma yin mod/ 'on kyang legs par brtags shing dpyad pa'i sgo nas bod kha ba can gyi gnam sa'i khyon la dbang sgyur ba'i gzhungs dga' ldan pho brang pa chen por rgyu mtshan rnams snyan gsan phul ba na/ rgyal khab chen po de nyid nas kyang rje 'di la khyod kyis dka' tshegs la mi blta bar rnam dpyod kyi dpung pas kun mkhyen e waM pa chen po'i bstan pa'i khur chen po de longs la/ spyi dang bye brag gis bsdus pa'i bstan pa rin po che'ang nyi 'od kyis reg pa'i padmo bzhin du rgyas par bya ba dang / 'os su gyur pa'i gdul bya rnams kyang 'khor ba dang ngan song gi g.yang sa las sgrol la/ rnam par grol ba'i nor bu'i khang bzang nyid du 'khrid cig ces pa'i bka' stsal gnyan po dzambu chu bo'i gser gyi cod pan lta bu shin tu lci zhing gzi brjid che ba dag stsal ba dang lhan cig /sa skya nas 'jam mgon khri chen rin po ches kyang de ltar bgyid dgos pa'i bka' stsal rin po che'i phreng ba lta bu shin tu lci bar phebs pa dang / ngor gyi bla gra tshang mas kyang gsol ba phur tshugs su btab pa la brten nas/ spyir sngon gyi rgyal ba sras dang bcas pa rnams kyis kyang sgrol bar ma nus pa'i snyigs ma'i sems can shin tu ma rungs pa rnams kyi khrod 'dir/ bstan pa dang sems can la phan pa bsgrub pa shin