[A:218]mkha' thams cad 'ja' sprin kha dog sna tshogs pas gang ba sogs ngo mtshar gyi ltas mang po mngon sum du lhags par gyur to/ /de nas rim pa bzhin rtsis sprod len gyi skor rnams kyang gna' bo'i lam srol bzang po ji lta ba bzhin mdzad pa yin no/ /mgon khyod mkhas pas 'jam dpal dang / /btsun phyir 'phags pa nye bar 'khor/ /ngang tshul bzang pos 'gro kun la/ /brtse bas lag na padmo nyid/ /de slad mkhyen brtse nus gsum gyi/ /yon tan bsam gyis mi khyab pa/ /thub dbang kho na'i rjes 'gro ste/ /gzhan pa'i dper 'os srid ma yin/ /rgyu des yid kyi brtan pa kun/ /cig car 'phrog pa'i ra mda' ru/ /chos kyi rgyal por mnga' gsol ba'i/ /gsol 'debs rol mo ci yang 'khrol/ /rang bde'i dpal la ma chags par/ /bstan 'gro'i khur chen len par brtsams/ /dka' yang gzhan don la dgyes pa/ /dam pa rnams kyi chos nyid yin/ /rigs kun bdag po'i mi'i rol par/ /sprul la spyi bos mi btud su/ /rgyal ba gnyis pa'i sku brnyan yang / /gus pa'i tshul gyis bzhengs la ltos/ /e ma srid zhi'i gtsug tor rtser/ /mngon par 'phags pa'i chos kyi khrir/ /zhabs kyi chu skyes bkod pa'i mod/ /phan bde'i 'dod rgu ci yang 'jo/ /dge legs bye ba'i dus dang gnas/ /ston 'khor dam chos phun tshogs pa'i/ /nges pa lnga ldan 'og min zhing / /sa 'dir gsar du 'phos par gyur/ /de lta'i skal bzang utpal/ /khong nas dgod pa'i dga' ston du/ /shis pa'i mtshan ris mang po yang / /brgya byin mdzub rtses bris bzhin lhags/ /tshul de'i snyan grags rgyud mangs glus/ /srid zhi'i khams kun khyab pa las/ /yid srubs dpung las rnam rgyal ba'i/ /bde skyid sgo 'phar ci yang phye// //gnyis pa bstan pa dang sems can gyi don ji ltar mdzad