[A:219]pa'i tshul ni/ de ltar chos kyi khri la zhabs sen bkod ma thag pa nas lo der phyogs mtha' dag nas 'dus pa'i don gnyer sum brgya skor la gsung ngag rin po che'i chos kyi 'khor lo bskor ba'i dbu btsugs pa nas bzung ste lcags mo sbrul lo'i bar gyi lo bcu bar ma chad par dgun gyi dus stod mnga' ris/ bar dbus gtsang / smad mdo khams rnams nas gdul bya skal ba dang ldan pa rdzogs ldan dus kyi sprin phung bzhin du 'dus pa rnams la/ rgyal ba'i bstan pa yongs rdzogs kyi nyams len du gyur pa grub chen birWa pa'i thugs bcud gsung ngag rin po che lam 'bras bu dang bcas pa'i sngon 'gro snang ba gsum gyi khrid dang / brgyud pa'i khyad par gnyis ldan gyi sems bskyed pa dang / dbang gi mngon par rtogs pa brgyad dang ldan pa'i rgyu dus kyi dbang bskur ba dang / lam gyi dngos gzhi rgyud gsum gyi khrid dang / de dag gi skabs su lam dus kyi dbang dang / cha lag tu gtogs pa'i byin rlabs rnams dang / rgyab rten gyi lung dang bcas pa shin tu rgyas pa tshar re dang / dpyid kyi dus don du gnyer ba sum brgya skor la/ bstan pa rin po che'i gzhi'am rtsa ba lta bur gyur pa'i dge bsnyen dang / dge tshul dang / dge slong gi sdom pa rnams rim pa bzhin du 'bogs par mdzad pa rnams ni lo bstar bzhin chag med yin la/ de lta bu'i rgyun chos tsam du ma zad dbyar dgun la sogs pa'i dus nges med rnams su'ang gsang sngags rdo rje theg pa'i bya ba dang / spyod pa dang / rnal 'byor dang / rnal 'byor chen po bla na med pa'i rgyud rnams kyi mngon par dbang bskur ba dang / byin gyis brlab pa dang / rjes su gnang ba dang / rig pa gtad pa la sogs pa rab tu mang po dang / de rnams dang rjes su 'brel pa'i bskyed rdzogs kyi khrid du ma dang / rgyab rten gyi lung dang / lag tu blang ba'i tshul rnams dang / bla ma gong ma'i bka' 'bum gyi