[A:221]gzim mchod gsum dang / mgron gnyer dang / drung yig dang / lde phyung ba dang / rtsA gnyer dang / shing gnyer sogs la'ang rang rang gi go babs dang bstun pa'i gnang sbyin gang la gang 'os dang / khyad par chos sde lho byang gi lha khang khag rnams su bzhugs pa'i rten gsum ngo mtshar ba rnams kyi mdun du mchod pa'i khyad par shin tu rgya che ba dang / sprul pa'i lha khang chen mor dge 'dun 'dus pa rgya mtshor mang ja 'gyed dang bcas pa'i bsnyen bkur gya nom pa bcas bsgrubs nas hor zla drug pa'i mjug tu e wa~M du phebs pa dang / gzhan yang sku'i 'phrod bzhes kyi tsha rong chu tshan du snga phyir tshar kha shas phebs pa ma gtogs ngor rang du bzhugs/ rje 'di dgung lo zhe gnyis pa dbang phyug gi lor sde dge chos rgyal chen po tshe dbang rdo rje rig 'dzin pa'ang dbus gtsang du phebs/ sa ngor gnyis kyi gtso byas pa'i dgon sde yod do cog la bsnyen bkur rgya chen po bstabs/ rje 'di la'ang sangs rgyas dngos kyi 'du shes mdzad cing / lan cig chos rgyal de nyid e wa~M pa'i lha khang rnams mjal du byon pa dang chabs cig rje 'dis kyang rten gsum rnams kyi byung khungs sogs gsung bzhin phebs pa'i tshe/ gtsang khang du chos rgyal mchog nas thub chen rin po cher 'bul rgyu'i snyan dar zhig rje 'di'i phyag tu phul ba ltar rje 'dis kyang thub dbang rin po cher sgron pa na/ gang nas byung cha med par snyan dar ser po zhig nar gyis byung ste chos rgyal de'i mgul du son par gyur la/ de la brten nas chos rgyal rang yang sngar rab tu 'byung 'dod shin tu che bar yod kyang stabs 'grig cig ma byung ba la/ da lan gyi rten 'brel 'dis ni ring nas brnags pa'i don thams cad 'bad med du 'grub par 'gyur ba'i ltas zhig go snyam pa'i dga' spro 'dun gsum cig car du 'phel bar gyur ces grags la/ gang ltar yang rje 'di las kye rdo rje rgyu lam gyi dbang