[A:243]gong 'phel du bya ba'i phyir/ dbus gtsang ljongs kyi bla ma dang dkon mchog la mchod pa dang / dge 'dun la bsnyen bkur rgya cher bsgrub pa'i slad du phyag rdzas ji yod bskur te rje drung bzang po blo gros dpon 'khor rnams gtong gnang mdzad pa bzhin khong rnams kyang bar chad med par rim gyis byon te/ byang rwa sgreng gi chos grwa chen po nas bzung / bod kyi rdo rje gdan dpal ldan sa skya'i bar gyi ris med pa'i dgon sde so so'i bla ma rnams su 'bul ba/ rten gsum yongs la mchod 'bul/ dge 'dun 'dus pa rgya mtshor bsnyen bkur rnams dpyis phyin par bsgrubs pa dang / khyad par ngor rang du'ang bla khag so sor 'bul ba dang / dgon par mang 'gyed kyi bsnyen bkur nyin bcu'i bar gang zab dang / gos chen gyi bla bre dang / 'phan la sogs pa mtshar zhing yid du 'ong ba dag sbyor 'jags zhus pa sogs/ mdor na rwa sgreng nas sa skya'i bar du ja dngul song tshad thams cad ja thog tu phab ste brtsis pas bzang ja 'khor drug brgyad brgya dang lnga bcu tham pa song 'dug pa dang / de'i rigs 'gres sku gsung thugs rten/ mchod cha'i skor sna tshogs/ dar ras ling gos chen la sogs pa dang / gcan gzan gyi pags pa'i rigs dang / thab cha'i rigs la sogs pa ji snyed cig song ba rnams ni smos kyis mi long / 'bul bar song ba'i rta phyugs kyi rigs kyang rta drel lnga bcu tham pa dang / mdzo g.yag lnga bcu nga grangs tsam song ba sogs mdor na snying po med pa'i zang zing gi dngos po rnams kyang snga na med pa'i bsod nams kyi phung por bsgyur bar mdzad pa dang / dgung lo nga bdun pa dga' ba zhes pa chu pho 'brug gi lor/ sdom brtson skye rgu'i bdag po byams pa kun dga' sangs rgyas bstan pa'i rgyal mtshan pa dbus gtsang phyogs kyi rten gsum rnams mjal zhing mchod 'bul dang