[A:445] /gzhan yang snga 'gyur rdo rje theg pa'i gdams ngag zab mo las nyer mkho'i rigs 'ga' zhig gi lung dang / sgrub brgyud karma kaM tshang nas brgyud pa'i gcod nam mkha' sgo 'byed kyi dbang dang / dpal sa skya pa'i bstan srung mgon po che chung gnyis su grags pa'i nang tshan zhal rnam 'gyur bcu bdun gyi rjes su gnang ba bcas gsan pa dang / yang nyams dang rtogs pa'i dbang phyug bla ma dpal ldan phrin las kyi drung nas/ dpal rdo rje nag po chen po gur gyi mgon po khro bo bcu gcig gi rjes gnang sngon du 'gro ba'i phyi khrid rdo rje brag rdzong ma dang / nang gi brag rdzong drag po sngags rgod/ gsang ba'i brag rdzong sems nyid ye shes kyi 'khor lo'i rtsal 'don pa bcas kyi nyams khrid zab mo yongs su rdzogs pa gsan pa dang / rgya chen chos kyi spyan ldan bla ma dge 'dun rgya mtsho'i drung nas bya rgyud padma'i rigs kyi gtso bo tshe dpag med lha dgu'i dbang bskur ba legs par gsan par mdzad do/ /gzhan yang yul phyogs so sor bde skyid rgya cher 'byung ba'i slad du lha bum dang / klu bum dang / sa bdag gi bum pa la sogs pa tshad dang ldan par bsgrubs te sba ba dang / lo re bzhin dbyar gyi dus char 'bebs pa la sogs pa zhi rgyas dbang drag dang rjes su 'brel ba'i mdzad phrin thams cad ni re re nas smos kyis mi lang ngo / /'phags rnams dag pa rab 'byams las/ /tha mal snang ba ma mchis mod/ /'gro 'di dad phyir mnal lam du/ /'dren pa mchog dang mjal tshul bstan/ /mgon des tshems kyi 'od dkar gyis/ /phyogs su snang ba rab sbyin cing / /lung bstan bdud rtsi'i char 'bebs pa/ /dag pa'i ri bong 'dzin pa bzhin/ /nam zhig sa yi bdag po yi/ /'phrin yig rin po che yi sgrom/ /gang gi phrag par