[A:450]bzhin dgongs pa khrol ba zhig ma byung zhing / slar yang nan tan gyis dgongs zhu mdzad par brten rim gyis sa sprel lor bod du 'byon chog pa'i dgongs khrol byung bar brten/ de skor gyi nyer bsdogs rnams kyang rim gyis brtsams pa dang / don du gnyer ba so sos ji ltar gsol ba btab pa bzhin du nA ro mkha' spyod ma'i khrid dang / kye rdo rje rgyu lam gyi dbang la sogs pa zab pa dang rgya che ba'i chos kyi 'khor lo'ang ci rigs par bskor te re ba'i shing rta yongs su 'gengs par mdzad pa dang / lhun grub steng gi gtsug lag khang du der bzhugs pa'i dge 'dun gang yod kyis bla ma mchod pa dang / tshe chog nyin kha shas tshogs te/ de dag la'ang bsnyen bkur dang gral 'gyed sogs zab par mdzad pa dang chabs cig gtsug lag khang der gos chen phul du son pa las grub pa'i bla bre dang / gos yug gi 'phan la sogs pa sbyor 'jags stsal ba dang / phan gling bla brang rang du'ang chos rgyal dge ba'i dbang pos mdzad pa'i bdag cag gi ston pa thub pa'i dbang po'i skyes rabs dpag bsam 'khri shing las byung ba ltar bris pa'i zhal thang gras 'grig nyi shu rtsa gcig gong gsham zhal khebs sogs phun sum tshogs pa dang / gser zangs las grub pa'i rgyal ba tshe mtha' yas pa'i sku brnyan mi tshad tsam gcig dang / gser zangs las grub pa'i spyan ras gzigs khru gang tsam dang / de bas chung tsam gyi yum chen mo'i gser sku sogs gsar sbyor mang du mdzad pa dang / gzhan chos srung rnams la skong phrin dang yul lhar bsang mchod la sogs pa skabs su bab pa'i rim gro'i rigs rnams bsgrub pa dang / chos rgyal chen po sku mched rnams kyis dbu byas pa'i sbyi bdag dad pa can thams cad nas kyang phebs brdzong dang 'bul