[A:356]phyag mdzod lta bu byas na legs pa 'dra gsungs pa dang / khyad par khu bo mkhan chen de nyid kyi drung du rje 'di sku mched gnyis char gyi mtshan zhig zhu bar mdzad pa'i tshe'ang / nged kyis bla ma la bla ma'i ming dang / grwa pa la grwa pa'i ming gdags kyi gsungs nas/ rje 'di la rnal 'byor 'jam dpal bzang po dang / gcung tshe dbang rdo rje la nor ldan shes rab bzang po zhes 'dogs par mdzad do/ /de lta bu'i rdo rje'i bka' de ni dus gsum thams cad thogs med du mkhyen pa'i gsung khyad par can 'jig rten na tshad mar gyur pa yin na'ang / slar yang 'gro ba rnams yid ches bskyed pa'i slad du/ de skabs su rgyal khams bskor ba'i rnal 'byor pa ston chen zer ba me long la bltas te de'i nang du ji ltar shar ba bzhin lung ston par byed pa zhig sleb par/ de la byis pa 'di gnyis sus bla ma byas na legs me long nang du ltos shig ces bka' stsal pa na/ des kyang de bzhin du bltas te ji ltar bka' stsal pa ltar rje 'di chos kyi bag chags shin tu mthug pas bla ma dang / chung ba 'di las byed cig byed par 'os so zhes gsol pa na/ des kyang ji lta ba bzhin mthong bar gzigs te bdag cag gi dpal ldan bla ma dam pa 'di gzod ma nyid nas srid pa dang zhi ba'i bla mar gyur zin na'ang / slar yang bdag sogs skal ba dman pa rnams kyi 'dren pa dam par yongs su gzengs bstod par mdzad do/ /da ni 'dir sde tshan gcig pa'i phyir tshigs phyi ma bsnyen par rdzogs pa'i bdud rtsi bzhes pa'i tshul brjod na/ de'ang thams cad mkhyen pa'i grong khyer du 'jug par 'dod pa'i skyes bu blo gros dang ldan pa rnams kyis ni 'khor ba dngos kyi gnyen po rnam par mi rtog pa'i shes rab bskyed pa'i thabs la 'bad dgos pa yin la/ de lta bu'i shes rab de'ang dmigs pa rtse gcig pa'i ting nge 'dzin la ltos la/ de'ang tshul khrims rnam par dag