[A:476]ba la rab tu byung ba dang / bsnyen par rdzogs pa mdzad tshun chad de dag gi bslab bya dang 'gal ba lta ga la zhig ste/ dgag sgrub gnang gsum gyi bslab pa'i gzhi mtha' dag tshul 'chos tsam ma yin par rang gi sku srog las kyang gces par bzung ste blang dor tshul bzhin du mdzad pa la brten nas/ nyes pa phra zhing phra bas kyang ma reg pa yin te/ tha na sku'i bzhugs tshul dang / na bza' bzhes tshul tshun chad nas mi legs par cung zad kyang mi mnga'/ spyod lam thams cad mdzes shing brjid chags pa dang / gang du bzhugs pa'i sa phyogs mtha' dag gtsang zhing yid du 'ong ba dang / sku lus las tshul khrims kyi dri bzang khyad par can 'thul ba sogs thams cad la mngon sum du snang ba 'di yin la/ rgyu mtshan de'i phyir na brtan mkhas kyi yon tan gnyis dang ldan pa'i bdag nyid chen po 'di ni sngon gyi 'phags pa dgra bcom pa rnams dang tshul mtshungs par bzhugs pa yin no/ /der ma zad sku na chung ngu'i dus nas theg chen gyi rigs sad de/ bdag pas gzhan gces kyi snying rje chen po bcos ma ma yin pa thugs rgyud la 'khrungs shing / de'i stobs kyis gzhan la phan gang thogs mdzad pa las/ gnod par 'gyur ba'i las til 'bru tsam yang mi mdzad la/ khyad par byang chub sems dpa'i sems bskyed kyi sdom pa gsan phyin chad byang chub sems dpa'i sde snod rnams nas ji ltar bshad pa ltar gyi nyes spyod thams cad sdom pa dang / pha rol tu phyin pa drug gi sgo nas dge ba'i chos thams cad yongs su sdud pa dang / bsdu ba'i dngos po bzhis sems can thams cad yongs su smin par mdzad pa sogs byang chub sems dpa'i spyod tshul rgya mtsho lta bu la slob par mdzad cing / khyad par du'ang mgon