[A:478]kyi rten bzhengs pa sogs chos mthun gyi mdzad pa dgos nges kho na las/ don med kyi bya byed mang po gtan nas mi mdzad cing / gzhan dag tshe 'di snang gi bya ba la mngon par zhen pa rnams la'ang shin tu thugs sun pa'i rnam pa kho na mdzad pa dang / g.yo sgyu zol zog gi rigs ni phra zhing phra ba'ang mi mkhyen pa lta bu yin te/ gsung sgros zhig mdzad pa'i tshe'ang thugs la gang shar de nyid thal byung du bka' stsal pa las 'khyog bshad kyi rigs gtan nas mi mdzad cing / gzhan dag gis kyang ngag nas brjod pa dang yid la bsam pa gnyis cung zad mi mthun par byung na'ang de 'dra'i g.yo sgyu gsung zhing shin tu thugs khrel bar 'gyur ba dang / skye bo su la'ang zur gyis 'khu ba dang / zhe gcod pa'i tshig ngan la sogs pa tha na pha rol pa'i yid du mi 'ong ba'i rnam 'gyur phra mo tshun chad spangs te/ dus rtag tu 'dzum pa'i bzhin dang / snyan pa'i gsung gis pha rol po'i yid yongs su tshim par mdzad pa sogs mdor na sa la gnas pa'i byang chub sems dpa' sems dpa' chen po rnams kyi rnam thar dang khyad par ci'ang med par byang chub sems dpa'i spyod tshul rgya mtsho lta bu las dus skad cig kyang g.yel ba med pa zhig go /khyad par rig pa 'dzin pa sngags kyi sdom pa'i dbang du byas na bya ba dang / spyod pa dang / rnal 'byor dang / rnal 'byor chen po bla na med pa'i rgyud kyi dbang bskur ba rnams legs par gsan phyin chad rgyud sde 'og ma so so'i dam tshig rnams dang / rgyud sde gong ma rnal 'byor bla na med pa'i dbang bzhi so so'i dam tshig mtha' dag srung sdom tshul bzhin du mdzad pa la brten nas/ nyes ltung gi dri ma phra zhing phra bas kyang ma gos shing / de'i ngang nas dngos grub thams cad kyi rtsa bar gyur pa dpal ldan bla ma dam pa rnams nges par rdo rje 'chang dngos