[A:494]du dad shugs kyi mchi ma rgyun mi 'chad par 'ong ba zhig 'dug /mngon sum las kyang gsal ba'i rmi lam de lta bu zhig byung bas rje 'di sku khams ci 'dra zhes dris byung ba dang / gzhis rtse nas 'tsho byed pa dang / de 'bod mi bcas kyang shin tu snga bar yar yong / phyug po gzhung ngos nas yar bltas pas ngor gyi thad kyi nam mkha' thams cad 'ja' kha dog lnga ldan gyis khrig ger gang 'dug ces gleng / gang ltar yang nyi shar tsam na ljags dbugs kyang mi snang bas/ bdag gis thugs dam gsal 'debs 'dra zhus pas spyan dmigs lta bu mdzad song ba bcas mdor na dgung grangs don drug tu phebs pa mig dmar zhes pa shing pho byi ba'i lo'i sa ga zla ba'i tshes bcu res gza' zla ba dang / skar ma rta chung 'dzom pa'i nyi dros sbrul gyi steng du rlung dang byang chub kyi sems thams cad sgra gcan gyi rtsa dbu ma'i nang du zhugs te gzhi la gnas pa'i 'od gsal ma dang / bsgom stobs kyis myong ba'i 'od gsal bu gnyis ro gcig tu 'dres nas don gyi 'od gsal zhes bya ba'i 'chi ba chos kyi sku'i ting nge 'dzin la snyoms par zhugs par gyur to/ /de'i tshe nam mkha'i mtha' skor na sprin mchod pa'i gzugs brnyan 'dra ba cung zad mchis pa dang / nam mkha'i mthongs thams cad kun tu dwangs zhing / nyi ma shin tu dro ba'i gseb nas gangs lta bu re zung 'babs pa ni bdag cag thams cad kyis mthong bas me tog gi char yin par mngon no/ /de nas nyi ma phyed tsam nas 'ja' sprin gyis nam mkha' phal cher khyab snang ngo / /bdag cag rnams ni mgon dang skyabs dang dpung gnyen thams cad dang bral bas dang nya bye tshan du dor ba'am/ rgya mtsho'i klong du ded dpon dang bral ba'i tshong phrug gi tshogs 'khyams pa bzhin du sdug bsngal drag pos non te ci bya gtol med du gyur rung / chos thams cad sems kyi cho 'phrul yin pa dang /