[A:349]rigs su 'khrungs la gsol ba 'debs/ /gzhon nu nyid nas nges 'byung snying rje sogs/ /theg chen rigs kyi nus pa yongs rdzogs pas/ /bsngags 'os yon tan bye ba'i snang ba yis/ /grags pa'i utpal rgyas der gsol ba 'debs/ /zhes gsungs pa ltar te/ de'ang ji skad du 'phags pa chos kyi dbyings kyi rang bzhin dbyer med pa bstan pa'i mdo las/ khams gsum du mtshams sbyor ba mi byed pa ni byang chub sems dpa'i shes pa ma yin gyi/ sems can rnams yongs su smin par bya ba'i phyir bsam bzhin du skye ba yongs su 'dzin pa ni byang chub sems dpa'i shes pa yin no/ /zhes dang / gsang ba bsam gyis mi khyab pa bstan pa las/ bcom ldan 'das byang chub sems dpa' brtson 'grus brtsams pa rnams ni 'khor ba la yongs su skyo ba'i blo skye bar mi 'gyur te/ bcom ldan 'das byang chub sems dpa' rnams ni sems can yongs su smin par bgyi ba'i slad du 'khor ba la phan yon du blta ba lags kyi/ mya ngan las 'das pa la ni de lta ma yin no/ /bcom ldan 'das byang chub sems dpa' rnams ni sems can gyi don la brtson pa lags so/ /zhes bka' stsal pa ltar/ bdag nyid chen po rnams ni zhi ba mya ngan las 'das pa'i bde ba la gzhar yang mi chags par/ ji ltar padmo'i tshal du bung ba 'jug pa bzhin du sems can rnams la rjes su brtse ba'i sgo nas srid pa yongs su gzung ba la rtse gcig tu gzhol ba chos nyid yin pa ltar/ bdag cag gi dpal ldan bla ma dam pa yon tan rin po che'i phung por gyur pa 'dis kyang gdul bya 'dul ba'i thabs la gzigs te chos kyi dbyings rang bzhin lhun gyis grub pa'i pho brang nas/ sa la gnas pa'i byang chub sems dpa' rnams kyi snang ngor longs spyod rdzogs pa'i sku dang / gdul bya thun mong ba rnams kyi snang ngor