[A:404]thugs la'ang da ni 'jig rten na smra ba'i nyi ma nub par 'gyur ro snyam pa'i thugs 'gyod shin tu che bar gyur na'ang khu bo mkhan chen de nyid kyi zhal snga nas/ yang dag par rdzogs pa'i sangs rgyas kyang sku mya ngan las 'da' ba'i tshul bstan na/ gzhan la mi rtag par byung ba lta ci smos zhes bya ba la sogs pa'i bka' stsal phebs pa dang / bla ma'i byin rlabs kyis thugs kyi mya ngan kyang rim gyis bsal bar gyur la/ de skabs kun tu nyin mtshan bar ma chad par bla ma'i zhabs tog 'ba' zhig mdzad pas/ sdig pa dag pa'i rtags nam mkha' la 'phur ba la sogs pa'i rmi ltas kyang mang du byung gsungs / de nas rje 'di dgung grangs so gnyis su phebs pa lcags 'brug hor zla dang po'i tshes bcu dgu'i nyin/ ji ltar byang chub sems dpa' sems dpa' chen po dam pa tog dkar po dga' ldan gyi yul nas dzambu'i gling du 'pho bar brtsams pa na/ rang gi cod pan rje btsun ma pham pa'i dbur bcings te theg pa chen po'i chos kyi rgyal tshab tu mnga' gsol ba dang / 'jam mgon sa paNDi ta chen po zhi bar gshegs pa'i tshe'ang / chos kyi dung dang lhung bzed la sogs pa 'phags pa rin po che la stsal te da ni khyod kyis bstan pa'i bya ba dang / sems can dpag tu med pa'i don bya ba'i dus la bab pas sngon gyi dam bcas pa dran par gyis shig /ces bka' stsal te chos kyi rgyal srid chen por mnga' gsol ba sogs dang tshul mtshungs par/ khu bo mkhan chen rdo rje 'chang chen po nyid kyi sku srung rwa lo'i mgul phur du grags pa dang / rten sgam dang / phyag phreng dang / dam tshig gi rdor dril rnams rje 'di la stsal te/ 'di nged kyi dam tshig rdor dril yin kyang / da khyed rang gi 'bral spangs dam tshig rdor dril gyis/ spyir khyed rang spun rnams kyi tshe la thar rtse yang dar zhing rgyas par 'byung / sgos khyed rang 'di