[A:421]pa mtha' dag rmi lam gyi rang bzhin lta bur mngon sum du gzigs pa la brten nas/ sku na chung ngu'i dus nas gcen byams pa kun dga' bstan 'dzin gyi drung du bdag grwa rkyang zhig byas te zur du bzhugs chog pa'i snyan sbron yang yang 'bul bar mdzad na'ang / de bzhin mdzad pa zhig ma byung la/ de rjes gong du bshad pa ltar rje 'di mdo khams nas yar e wa~M du phebs pa'i skabs kyang / sde dge chos rgyal chen pos gcen mkhan chen khri thog pa byams pa kun dga' bstan 'dzin mdo khams su gdan 'dren zhu mi ched du mngags par brten/ sa skya nas kyang bla brang rtsis sprod 'phral du bgyis te mdo khams su phebs dgos tshul dang / gal srid rtsis sprod 'grig min yod tshe rje 'di mkhan por bsko bzhag bgyis chog tshul bka' phebs na'ang / de dag la thugs 'dun gtan nas ma mdzad rung / dgung grangs zhe bdun tu phebs pa myos byed ces pa shing mo lug gi lor phan khang mkhan rin po che byams pa dpal ldan bzang po e wa~M pa'i mkhan sa dgongs khrol nan tan chen pos zhus par brten/ e wa~M pa'i bla khag khang tshan dang bcas pa thams cad kyis mgrin gcig tu/ da ni rje 'di kho na kun mkhyen e wa~M pa chen po'i chos kyi rgyal srid chen por mnga' gsol bar 'os so zhes gleng zhing / rje 'di la'ang gsol ba phur tshugs su btab pa na/ spyir dgon pa'i 'dzin skyong gi khur 'di shes 'khos kyis lcogs dka' bar ma zad/ gal srid bstan pa'i khur blangs kyang chags sdang 'phel ba'i rgyu kho na las ma 'das pas e wa~M pa'i mkhan sa 'dzin mi dgos pa'i dgongs khrol dgos tshul nan tan gyis bka' stsal rung / e wa~M pa'i bla khag khang tshan thams cad kyis mkhan por 'os pa rje 'di kho na las gzhan su yang med do zhes dpal ldan sa skya'i 'jam mgon khri