[A:438]mjal ba dang / khyad par ston mchog thub pa'i dbang po'i sku brnyan rnam pa gnyis kyi gtso byas pa'i rten gsum yongs la mchod 'bul dang thugs smon sogs zhib par mdzad nas chibs kyi gdong bsgyur te/ ji skad du/ sangs rgyas nyi ma gdul bya yi/ /ri la ji ltar 'os pa 'babs/ /zhes pa ltar/ shin tu bgrod par dka' ba'i la lung mang po rim gyis brgal zhing / 'os su gyur pa'i gdul bya rnams la chos kyi bdud rtsi'ang ci rigs par stsol bzhin pa'i sgo nas bod chen po'i ljongs su phebs par gyur to/ /de nas mdo smad sde bzhi dang dge bcu'i dpal gyis mngon par sgeg pa'i rgyal khab nas mi bdag sa'i tshangs pa chen po'i snga phyir chibs bsu'i tshogs dbyar gyi chu 'dzin 'khrigs pa bzhin du lhags pa rnams dang lhan cig tu byon/ khyad par du dpal ldan lhun grub steng gi dge 'dun 'dus pa rgya mtsho'i ser sbreng gi bkod pa lta bas chog mi shes pa/ ji ltar bye ru'i 'khri shing tshar du dngar ba la/ dbang gzhu'i ri mos mdzes par spud pas kyang dper bya bar mi bzod pa'i ngo mtshar gyi phung po chen po skye bo rnams kyi mig dang yid kyi brtan pa cig car du 'phrog pa rnams kyis mdun nas bsus te/ khrums zla'i dkar phyogs kyi rgyal ba gsum pa'i nyin mdo khams zal mo sgang gi sa'i thig le sde dge lhun grub steng gi rgyal khab chen po mi mthun pa'i phyogs thams cad las rnam par rgyal ba ga la bar nye 'tshe'i dri ma med pa bde par phebs par gyur to/ /der 'khod pa'i 'gro ba mi dang mi ma yin pa thams cad kyi kyang mtshan dpe'i bkod pa mngon sum du mig gi bdud rtsir gyur cing / legs par gsungs pa'i sgra dbyangs rna ba'i bcud du son pas spro ba mchog gi shing rta'i rtse mor 'dzegs par gyur to/ /