[A:439]de nyin chos rgyal mchog nas kyang thog mar 'os pa'i dga' ston gya nom pa bstabs pa dang / rje 'dis kyang chos rgyal chen po'i mdun du thog ma'i zhal mjal la rong gi tshul du bkra shis pa'i lha gos dang / sku gsung thugs kyi rten khyad par du 'phags pa du mas thog drangs/ legs 'bul gyi dngos po rgya che zhing dpangs mi dman pa phul ba dang / de nas rim gyis chos rgyal chen po sku sger dang / de'i sku mched sde dge bla chen byams pa kun dga' 'jam dpal phan bde'i snying po dang / de'i gcung tshe dbang rdo rje dgra 'dul la sogs pa'i sku ngo khag rnams dang / bka'i blon chen rigs dang / phyag mdzod dang / tshong dpon dang / mdun skor la sogs pa rnams dang / dgon pa'i bla ma dbu chos la sogs pa rnams la'ang rang rang gi go babs dang bstun pa'i la rong gi 'bul ba dang gnang sbyin sogs zab par mdzad/ khyad par zla ba de'i tshes bco lnga'i nyin mdo smad kyi bstan 'gro yongs kyi mgon dang skyabs dang dpung gnyen dam par yongs su mnga' gsol ba'i slad du/ rje 'di ston 'khor gyi tshogs dang bcas pa dpal ldan lhun grub steng gi gtsug lag khang chen por spyan drangs te/ sngon e wa~M pa'i mkhan po rim byon thams cad kyi zhabs kyi chu skyes rnam par bkod pa'i seng ges bteg pa'i rin po che'i khri 'phang mthon por zhabs mthil 'khor lo'i re khA rnam par bkod de bzhugs su gsol zhing / de nas ji skad du mdo rgya che rol pa las/ khyod kyis sngon chad dge las bsags pa dang / /yun ring dus kyi dge bas byung ba dang / /khyod kyis chos rnams kun gyi tshul sbyangs pas/ /de ring mchod pa rgya chen byung bar gyur/ /ces 'byung ba ltar bod chen po'i ljongs kyi skye rgu yongs kyi bdag po chos rgyal byang chub sems