[A:440]dpa' mchog nas snga na med pa'i dad pa dang spro ba'i 'dzum rlabs khongs nas g.yo bzhin pa'i sgo nas bkra shis pa'i ri mos mngon par 'khyud pa'i lha rdzas kundA ltar dkar ba dang / sku rten du rgyal ba tshe mtha' yas pa la sogs pa'i sku brnyan du ma dang / gsung rten du 'phags yul gyi mkhas dang grub pa rnams kyi bstan bcos gangs can gyi ljongs su 'gyur ro 'tshal dang / thugs kyi rten du bka' gdams mchod rten la sogs pa'i mchod rten kha shas dang / bkra shis pa'i rdzas brgyad la sogs pa sngon du 'gro ba'i sgo nas lha dang mi'i 'jig rten na shin tu rin thang che zhing rnyed par dka' ba'i nor gyi mchog rnam grangs shin tu mang po'i legs 'bul gya nom pa bstabs pa dang / de dag gi skabs su rdo rje 'dzin pa dge 'dun rgya mtsho pa 'dus tshogs dang bcas pas tshe dpag tu med pa lha dgu'i cho ga dang 'brel ba'i sgo nas zhabs pad brtan pa'i rten 'byung bsgrigs/ mkhas pa'i dbang po shar bla ma kun dga' dpal ldan pas phun sum tshogs pa lnga dang / maNDal gyi bshad pa rgya cher spros/ gnyer chen rgya mkhar dge legs kyi tshig don rmad du byung ba'i legs 'bul gyi yi ge brjod ba dag cing gsangs mtho bar bsgrags/ de'i rjes su chos rgyal chen po'i sku'i 'gal rkyen sel ba'i bla ma dang / chos khrims dang / grwa tshang dang / bka'i 'khor los sgyur ba'i mdun na 'don chen po rnams dang / phyag mdzod dang / mdun skor dang / tshong dpon dang / dpon skya dang / hor 'dra rnams dang / lhun grub steng du gnyug mar bzhugs pa'i bla ma dang / slob dpon dang / chos khrims dang / spyi pa'i dus ja khag rnams dang / gzhan yang dge tshul slong rab tu mang po dang / rdzong khag chen po rnams kyi mnga' 'og tu gtogs so