[A:441]'tshal gyi bla ma dang / mi dpon dang / dgon pa dang / khyim bdag 'byor pa dang ldan pa rnams te/ de dag so so nas kyang rmad du byung ba'i dad pa dang spro ba'i chu gter gyen du 'phyur ba'i stobs kyis legs 'bul gyi dngos po rgya che zhing dpangs mi dman pa sum cu rtsa gsum pa'i dpal dang longs spyod kyi ngo mtshar la'ang co 'dri bar byed pa dag brtsegs te/ mdo khams kyi bstan 'gro'i mgon du legs par mnga' gsol bas skal ba bzang po'i sprin phung gsar du 'khrigs par gyur to/ /de ltar bgyis pa'i dge ba'i rtsa ba thams cad kyang bsngo ba'i yon bshad kyi 'bel gtam rgyas par spro bas mtshams sbyar te bar ma dor chud mi za ba'i slad du 'khor gsum rnam par mi rtog pa'i shes rab kyis bla na med pa'i byang chub chen por yongs su bsngo ba'i rgyas 'debs par mdzad pa dang / der 'dus pa'i skye bo rnams kyang ngor chen rdo rje 'chang chen po'i thugs dam gyi lha khyad par can gtsug tor rnam par rgyal ma lha dgu'i 'chi med tshe'i rjes su gnang ba'i chos kyi bdud rtsis yid yongs su tshim par mdzad do/ /de dag gi dus kyi tshe'ang nam mkha'i dbyings thams cad kha dog sna tshogs pa'i dbang po'i gzhu ris pa tra'i ri mo ltar 'khyil ba dang / ljon shing ltar gyes pa dang / ba dan ltar 'phyang ba la sogs pa'i ngo mtshar ba'i bkod pa mang po'ang gsar du shar bar gyur to/ /de nas bzung ste dgung grangs drug cu pa sa pho spre'u lo'i bar mdo khams su bzhugs pa'i skabs/ mdo smad kyi phyogs 'ga' dang / chos rgyal chen po'i chab srid la'ang cung zad mtho 'tsham pa rtse ba'i tshos lor grags pa'i khrom pa sde dang bcas la dpung gi sbyor ba bshams pa tsam gyis dbang du 'dus pas mtshon/ rje nyid kyi