[A:442]thugs rje'i byin rlabs tshad med pas bdag po chen po sku mched rnams kyang sku la snyun med cing / mnga' ris su gtogs pa mtha' dag 'byor pa/ rgyas pa/ bde ba/ lo legs pa sogs sde bzhi'i dge mtshan gyi dpal rab tu rgyas shing / me pho rta'i lor sbyin bdag chen po'i lcam snga ma la rigs brgyud med pas/ dar mdo lcags la'i sras mo khab tu bzhes pa'i tshe'ang legs lam gyi snang ba brgyas par spel ba'i thugs dam skyabs 'jug gi bka' drin bskyangs pa la brten nas sprul pa'i gdung rabs rgyun mi 'chad pa'i dge mtshan mngon du gyur/ des mtshon te 'bri chu rong 'grim gyi me tog la lan cig dang / rdza khog dang sga stod kyi phyogs su lan cig dang / smad shod phyogs su sbyin bdag dad pa can rnams kyis gdan drangs pa'i ngor lan bzhi tsam phebs/ de thams cad du'ang 'phral yun gyi 'gal rkyen mtha' dag zhi zhing / mthun rkyen legs tshogs thams cad gong 'phel du mdzad pa dang / khyad par du'ang gdul bya so so'i blo'i rim pa dang bstun pa'i zab pa dang rgya che ba'i chos kyi 'khor lo rgya chen po bskor te/ skye bo phal che ba ni dkon mchog gsum la skyabs su song zhing bslab pa'i gzhi bzung ba la bkod/ 'ga' zhig ni khyim nas khyim med par rab tu byung ste 'khor ba las mngon par 'phags pa'i gnas la bkod/ la la ni bla na med pa yang dag par rdzogs pa'i byang chub tu sems bskyed pa stsal te theg pa chen po'i rigs su bkod/ la la ni gsang sngags rdo rje theg pa'i chos kyi sgor smin par byas te ring por mi thogs par rnam par grol ba'i skal ba dang ldan par mdzad do/ /mdor na skye bo phal che ba sangs rgyas la gzhol ba dang /