[A:542]tog 'bar ba 'dzin bzod pa'i/ /zla ba'i bzhin ldan ma de ji lta bu/ /mdzes sdug 'khyil ba lha mo'i bdud rtsi las/ /sman gyi ljon shing lta bu'i khye'u zhig /dbang po'i dwangs ma bzhin du 'khrungs mthong nas/ /'gro ba'i mig ni re zhig g.yo ma gyur/ /mdzes ldan gzhon nu'i lus kyi myu gu gang / /thog mar gyur kyang zhi zhing dul la sogs/ /bsam mi khyab pa'i lhan skyes yon tan ni/ /bdud rtsi'i rang bzhin can gyi zla ba bzhin/ /zhes khams gsum chos kyi rgyal po mkhan chen rdo rje 'chang byams pa kun dga' bstan pa'i rgyal mtshan dpal bzang po'i rnam par thar pa yon tan mtha' yas pa'i rgya mtsho dngos grub kyi rba rlabs rnam par g.yo ba las/ sems can gyi don du sku'i skye ba yongs su gzung zhing gzhon nu'i rol rtsed mdzad pa'i skabs te dang po'o// // ! de nas dgung grangs bzhir son pa'i skabs shig 'di ltar dgongs par gsal te/ khyim na gnas pa ni bu dang chung ma la sogs pa 'dod pa'i yon tan dug chu lta bu dang 'dres pas mngon par zin pa'i dbang gis khyim gyi so tshis dang longs spyod kyi rtsol sgrub la sogs pa g.yeng ba kho nas rtag tu mnar ba'i phyir gnas skabs dang mthar thug gi phan bde sgrub pa'i skabs dang bral zhing sdug bsngal thams cad kyi 'byung khungs su 'gyur la/ gang dag khyim gyi dpal 'byor thams cad mchil ma'i thal ba bzhin du spangs te tsandan dang zla 'od kyis reg pa ltar bsil ba'i dgon pa'i gnas nyams dga' ba dag tu zhugs nas rab tu byung ba'i brtul zhugs yang dag par len pa rnams ni gnas skabs dang mthar thug gi phan bde ma lus par myur du 'grub par 'gyur ba yin te/ 'jam dpal gyis sangs