[A:543]rgyas kyi zhing gi bkod pa bstan pa'i mdo las kyang / shA ri'i bu byang chub sems dpa' khyim pa gang gis ganggA'i klung gi bye ma snyed kyi de bzhin gshegs pa dge slong gi dge 'dun dang bcas pa rnams la ganggA'i klung gi bye ma snyed kyi bskal par bde bar sbyar ba thams cad kyis bsti stang du byas pa bas/ byang chub sems dpa' rab tu byung bas dben pa 'dod cing dgon pa la sogs su phyogs te gom pa bdun bor na 'di ni de bas bsod nams ches mang du bskyed do/ /ches myur du byang chub 'thob par 'gyur ro/ /zhes gsungs so/ /de lta bas na snying po med pa'i khyim gyi 'byor pa mtha' dag myur du spangs nas dben pa'i gnas su bgrod de rab tu byung ba'i rtags yang dag par len pa'i thabs kyis dad pa can rnams tshul 'di lta bu la 'god pa'i dus la nges par bab pa'o snyam du nges 'byung dang byang chub kyi sems kyi rgya mtsho chen po las thon pa'i thabs mkhas kyi dgongs pa bla na med pa zla ba tshes pa lta bus thugs rgyud yongs su bskul te yon tan rin po che du ma'i 'byung gnas dpal e wa~M chos ldan du pheb/ lo der mkhan chen rdo rje 'chang byams pa kun dga' bstan 'dzin sde dge chos rgyal chen po dang lhan cig bod du pheb par brten dgung grangs lnga pa chu mo sbrul gyi lor rje nyid kyi drung du yongs rdzogs dge bsnyen gyi sdom pa bzhes te/ mtshan la byams pa kun dga' bstan pa'i rgyal mtshan zhes stsal/ de nas bzung dgung grangs bcu gcig tu ma phebs kyi bar mkhan chen rdo rje 'chang rnal 'byor 'jam dpal bzang po'i zhabs drung du bsnyen te sngon gyi dus su rgyal bu gzhon nu don thams cad grub pas byis pa'i slob dpon kun gyi bshes gnyen sogs las yi ge dang rtsis la sogs