[A:545]mngon du 'jug pa'i them skas 'og ma dang 'dra ba ni gzhi tshul khrims kyi bslab pa nyid yin zhing / der ma zad bla na med pa'i byang chub kyi dngos rgyu dmigs pa la sems rtse gcig pa'i bsam gtan las byung ba'i zag med kyi shes rab phun sum tshogs pa skyed pa'i gzhi'ang tshul khrims rnam par dag pa nyid yin par gzigs shing / tshul khrims de'ang tshe 'di dang phyi ma'i sdug bsngal las bral ba dang / de dag gi bde skyid tsam don du gnyer ba'i sgo nas len pa 'jigs skyob dang legs smon gyi tshul khrims lta bu ma yin par khams gsum 'khor ba'i sdug bsngal rgyu dang bcas pa las thar pa myang 'das 'thob 'dod kyi bsam pa rnam par dag pa dang / de'ang nam mkha' dang mnyam pa'i sems can thams cad 'khor ba las sgrol 'dod kyi snying rje chen po'i sgo nas mthar thug gi myang 'das rnam pa thams cad mkhyen pa'i go 'phang rin po myur du 'thob par bzhed pa'i nges 'byung gi bsam pa rnam par dag pas thugs rgyud yongs su drangs te/ de'ang dus 'khor rtsa rgyud las/ rten ni gsum las dge slong mchog /'bring ni dge tshul yin par 'dod/ /khyim na gnas pa tha ma'o/ /zhes gsungs pa ltar rten rnams kyi nang nas gsang sngags kyi dbang bskur ba dang rgyud bshad pa la sogs pa rdo rje slob dpon khyad par can du 'gyur ba ni bsnyen par rdzogs pa'i sdom pa dang ldan pa la ltos pa'i phyir so thar rigs brgyad kyi nang nas mchog tu gyur pa dge slong gi dngos po sgrub pa nyid yin par dgongs nas/ dgung grangs nyer gcig tu pheb pa sa mo bya'i lo'i hor zla gnyis pa'i nang / ji skad du/ sum brgya pa las/ tshul khrims ldan zhing 'dul ba'i cho ga shes/ /nad par snying brtse 'khor