[A:546]ni dag pa dang / /chos dang zang zing phan 'dogs kyis brtson pa/ /dus su 'doms pa de dag bla mar bsngags/ /zhes gsungs pa ltar btsun pa brtan pa'i yon tan dang / mkhas shing phan 'dogs pa'i yon tan bsam gyis mi khyab pa'i bdag nyid can mtshan brjod par dka' ba don gyi slad du mtshan nas smos na/ byams pa kun dga' bstan 'dzin bkra shis grags pa'i rgyal mtshan dpal bzang po'i zhal snga nas kyis mkhan po dang / las kyi slob dpon skye rgu'i skyabs gcig zhabs drung rin po che 'jam dbyangs nam mkha' rgyal mtshan dang / gsang ste ston pa'i slob dpon gsung rab dgongs 'grel dang bcas pa'i glebs bam gcig pur gyur pa 'jam pa'i dbyangs ngag dbang legs grub la sogs pa dad pa'i dge 'dun grangs tshang ba'i dbus su tshigs gsum rim can gyi sdom pa rnam par dag pa legs par bzhes te 'dod pa'i dbang phyug dpung dang bcas pa las rnam par rgyal ba'i rgyal mtshan srid pa'i rtse mo'i bar du bsgrengs par mdzad do/ /de ltar rje btsun dam pa 'dis bsnyen par rdzogs pa dge slong gi sdom pa bzhes pa na nag po'i phyogs la dga' ba rnams dang lha ma yin gyi ris rnams ni yongs su 'gribs/ bstan pa rin po che dang dkar po'i phyogs la mngon par dga' ba'i lha dang mi'i phyogs ni zla ba yar gyi ngo bzhin gong nas gong du 'phel bar gyur te/ phyogs dang phyogs mtshams thams cad du snyan grags kyi 'ur chen po langs pa la brten nas sa bla'i lha rnams kyis rgyal chen ris bzhi pa dang / de rnams kyis sum cu rtsa gsum pa dang / de dag gis kyang 'thab bral nas 'og min gyi bar du bsgrags te 'jig rten gyi khams ma lus pa yongs su khyab par gyur to/ /de ltar na nges