[A:551]bskur bar mdzad pas mtshon/ mdor na/ gang gi theg mchog dam pa 'di mdzes pa'i/ /blo gros chen po rnams kyi rgyan bzhi ste/ /tshul khrims ting 'dzin de bzhin shes rab don/ /shin tu rnam par nges dang de bzhin gzungs / /zhes sogs gsungs pa lta bu'i byang chub sems dpa'i rgyan rnam pa bzhi/ snang ba rnam pa brgyad/ snying rje chen po bcu drug /phrin las sum cu rtsa gnyis la sogs pas mtshon tshul khrims gsum gyis bsdus pa'i byang chub sems dpa'i spyod pa rgya mtsho lta bu la tshul bzhin du bslabs pa'i sgo nas sems can thams cad gnas skabs dang mthar thug gi phan bde bla na med pa la dgod pa'i thabs kyi rim pa sna tshogs pa zhig la phyag len du mdzad pa yin te/ slob dpon ma ti tsi tras/ 'khor ba mi bzad gting nas ni/ /'gro ba nyon mongs drang slad du/ /khyod kyis gang zhig ma btsal ba'i/ /thabs dang spyod pa de ma mchis/ /zhes ji skad gsungs pa lta bu'o/ /khyad par du'ang phyi nang gsang ba'i de kho na nyid bcu la sogs pa rgyud sde rin po che rnams nas ji skad gsungs pa'i mtshan nyid thams cad yongs su rdzogs pa rigs thams cad kyi bdag po rdo rjai 'chang byams pa kun dga' bstan 'dzin gyi zhal snga nas thabs dang shes rab gnyis su med pa'i rgyud kyi rgyal po dpal dges pa rdo rje rtsa bshad kyi rgyud rnams nas gsungs pa'i bcom ldan 'das snying po kye rdo rje lha dgu'i rdul tshon gyi dkyil 'khor chen por rdo rje theg pa'i lam gyi rtsa ba smin byed dbang gi chu bo ma nub pa legs par gsan te/ phung khams skye mched gdan gsum lha'i rang bzhin du byin gyis brlabs pa la brten nas dbang las byung ba'i ye shes brjod bral lhan cig skyes pa don gyi sdom pa thob par mdzad cing / de nas