[A:602]po che rnams nas gsungs pa'i gso sbyong sogs gzhi gsum gyi cho ga rim bzhin gsar du btsugs par mdzad de/ de'ang chos grwa chen po 'dir sngon gyi dus rdo rje 'chang chen po slob ma'i tshogs dang bcas pa chos kyi dbyings su gshegs pa'i tshul bstan nas yun ring du song ba na rim gyis mkhas pa dang grub pa'i rgyal mtshan 'dzin pa dag ni je nyung je nyung du gyur/ ci'ang mi shes pa'i blun po snying phod can dag ni spang las shwa mang brdol ba ltar mang du tshogs pa'i rkyen gyis 'dul ba'i phyag len la sogs pa rim bzhin bag la zha bar gyur pa'i dbang gis phyi dus 'di na chos kyi spyan dang ldan pa'i skyes chen dam pa 'ga' zhig bzhugs pa rnams ma gtogs phal cher ni lus la ngur smrig gi rgyal mtshan 'chang bas mdzes pa tsam du zad kyi/ gzhan du na 'dul ba lung sde bzhi sogs gsung rab rin po che rnams dang / dgongs 'grel gyi slob dpon yon shAka rnam gnyis kyi bstan bcos sogs gzhung lugs rgya chen po dag la blo kha phyogs pa ni lta ci smos/ 'phral du spang blang bya rgyu'i dgag sgrub gnang gsum gyi bslab bya phra mo tsam yang ngos zin pa dang / khyad par gzhi gsum gyi lag len la sogs pa ni ming tsam yang shes par dka' ba'i gnas skabs de lta bur gyur pa na/ rje rin po che 'di nyid kyis legs gsung 'dul ba'i bstan pa slar yang spel ba'i thugs bskyed bzang pos dgon 'dir gso sbyong dang / dbyar gnas dang / dgag dbye la sogs pa'i phyag len phra mo tshun chad ma nyams par rgyun chags su mdzad dgos pa'i srol chen po btod de/ legs gsung 'dul ba rgya mtsho'i bstan pa'i me ro rmang nas bslangs par mdzad do/ /de skor zla ba drug pa'i nang rje nyid dbur bzhugs pa'i dge slong bzang gras dbyar gnas la pheb pa rnams kyis sman bla'i mdo chog /