[A:530]bla ma dpal ldan he ru ka /zhes dang / ye shes grub pa las kyang / bla ma sangs rgyas chos gyur cing / /dge 'dun yang ni de nyid de/ /de yi drin gyis shes 'gyur pas/ /de bas dkon mchog gsum yang yin/ /zhes bya ba la sogs pa mang du gsungs so/ /de ltar yin pa de'i phyir gang zhig rtogs na tshe 'di la rdzogs pa'i sangs rgyas kyi go 'phang 'thob par nus pa'i sems nyid lhan cig skyes pa'i ye shes rdo rje slob dpon la bsnyen bkur ba dang gsol ba 'debs pa sogs bla ma mnyes pa'i zhal snga kho na las rtogs par 'gyur ba yin te/ kye rdo rje las/ gzhan gyis brjod min lhan cig skyes/ /gang du yang ni mi rnyed de/ /bla ma'i dus thabs bsten pa dang / /bdag gi bsod nams las shes bya/ /zhes dang / ye shes thig le las/ don dam pa yi rang bzhin ni/ /yang dag rtogs pa'i gnas med do/ /thabs la sogs pa'i rim pa yis/ /bla ma'i zhal nas rnyed par 'gyur/ /zhes dang / bla ma'i zhal snga'i bka' drin las/ /mchog gi gnas ni rnyed par 'gyur/ /tshe 'di yis ni phyag rgya che'i/ /dngos grub rnyed par the tshom med/ /sa bcu yi ni dbang phyug dag /de yis bka' drin gyis ni sla/ /de bas bla ma las lhag gzhan/ /ston pa chen po ga la yod/ /ces dang / phyag thig las kyang / brjod med mi zad zhi ba ste/ /rang dga' nyams myong rnam pa can/ /bla ma yi ni bka' drin gyis/ /legs rgyas