[A:611]mdzad do/ /lo der 'brug par bla ma 'jigs med chos kyi rgyal mtshan zhus pa'i ngor jo lugs sgrol ma nyer gcig dang / dbu ma lugs kyi sems bskyed sogs bka' chos 'ga' zhig dang / gzhan yang don gnyer du ma'i ngor nA ro mkha' spyod kyi khrid dang / sbyong dkyil bcu gnyis kyi dbang / sgrub thabs rgya mtsho'i rjes gnang sogs bka' chos bsam las 'das pa stsal/ bya sprel gnyis kyi skabs 'dir mkhan chen rdo rje 'chang byams pa nam mkha' 'chi med khu dbon gsum po'i rnam thar las mkhan phyi ma rnam gnyis sku mya ngan las 'das pa yan gyi rnam thar skor yongs su rdzogs par grub pa sogs gsung rtsom gyi rim pa'ang mang du mdzad/ de nas dgung grangs so bzhir pheb pa chu khyi hor zla dang po'i nang smyung bar gnas pa tshar lnga bcu tsam gtong bar mdzad/ lo de'i hor zla gsum pa nyis brtsegs kyi snga ma'i tshes bcu bdun nyin srid pa gsum na rnyed par dka' ba'i yon tan gyi rgya mtsho chen po mkhan chen rdo rje 'chang byams pa kun dga' bstan 'dzin de nyid gzugs sku'i bkod pa chos kyi dbyings su bsdu ba'i tshul bstan pa'i skabs zhi bar gshegs nas thugs dam ma grol gyi bar du rdo rje 'chang de nyid kyis thugs dam nyams bzhes ji ltar mdzad pa rnams thugs nyams su bzhes shing gsol ba 'debs pa nas brtsams te/ rgyud sde rin po che rnams nas ji skad gsungs pa bzhin sku gdung rin po cher sku khrus gsol ba dang / sku gsung thugs kyi rig sngags sogs gdags pa dang bcas/ bsil sman la sogs pa dri bzang pos bsgos pa'i lha rdzas kyi na bza' dang bcas te gdung sgrom gyi bzhugs khri'i steng du bzhugs su gsol ba nyid rnam snang dgyes pa rdo rjer bskyed cing bzlas pa bya ba sogs phyag len