[A:246]sogs la gzhon nu'i rol rtsed tshul du yi ge'i phyi mo 'bri klog sogs kyi bslab sbyong gi rnam par bstan skabs kyang / tha mal pa'i spyod pa las 'das shing / kun gyis yid smon bya ba'i gnas su gyur pa zhig yod ces thos so/ /bgrang bya dgu par son pa'i tshe/ /ma yum gshegs pa'i dgongs rdzogs la yab gzhis kyi rgyu rdzas longs spyod yod rgu rtsal sbrugs su dge rtsa smin par mdzad cing / lcam sring gnyis kyang chos sgo la bcug nas/ yab sras gnyis lhan cig tu khyim gyi 'ching ba rtswa bzhin du rgyang bsreng ste dpal e waM chos ldan mkhas btsun grub pa bye ba'i bsti gnas/ mkha' 'gro dam can 'du ba'i dga' tshal/ gsang chen rdo rje bkod pa'i pho brang / nges par don gyi sangs rgyas mang po byon pa'i gnas mchog de nyid du zhabs kyi padmo bkod de/ dge legs kyi sgo 'phar bye ba phrag brgya gcig car du grol ba'i nyer bsdogs brtsams so/ /sna tshogs spros pa'i mtshan ma ma lus pa/ /mkha' yi rdo rje'i zhabs la phyag byas nas/ /mkha' khyab spros pa'i drwa ba rgya mtsho'i sprin/ /slar yang 'du 'god ston pa'i ngang tshul 'di/ /phyogs re'i lam du mtha' gcig ma lhung ba'i/ /phyogs med yangs pa chen po'i phyag rjes su/ /phyogs bcu'i sgron me dus gsum ma sgrib pa/ /phyogs rnams kun nas rnam par snang 'di mtshar/ /de yang sdom gsum rim can gyi chu lud bran nas gzhi rgyud kyi zhing sa sbyong zhing rgyas 'gyur gyi sa bon sbrum pa dang / thos bsam sgom gsum gyi so nam mdzad nas skyes bu chen po'i rtsal drug gi lo tog rgyas pa dang / 'dzin skyong