[A:245]tshe khu bo mkhas grub mchog des dbu zhwa gser gyi mdog can dbu la gsol/ sngags mdud dbang gi mdog can mgul du phul bar mdzad cing / khye'u chung gzhan 'gran med pa 'di ni rgyal ba'i bstan la gzhug dgos/ /'jug tshul go rim ma nor ba/ dang po khyim nas khyim med pa rab tu 'byung zhing thos bsam sgom gsum rim pa bzhin du bsten nas bstan 'dzin khyad par can 'gyur ba zhig dgos so zhes yab la bka' bslab gnang zhing de ltar 'ong ba'i 'dun smon rgyal ba sras bcas grogs su sbran nas mdzad do/ /de'i tshe rgyal ba'i myu gu de nyid dgyes pa'i zhal ras mdzums pa'i mdangs dmul bzhin bzhad pa'i sgra dbyangs rnam par sgrogs pa ni/ dkar phyogs ma lus pa dbugs 'byin pa'i dga' ston rmad du byung ba lha dang bcas pa'i 'jig rten pa thams cad bde ba'i mchog sbyin pa'i sgo dang po phyes so/ /a ho srid min srid pa'i rol rtsed 'di/ /skye med skye ba'i sgyu rtsal chen po las/ /mtha' med mtha' can srid pa'i do ra nang / /chags med chags pa'i zol gyis rtse min nam/ /srid zhi'i dge legs kun 'byung nor bu'i ljon/ /srid 'dir 'khrungs pa'i skal bzang myong ba'i slad/ /srid pa'i lha rnams gnyen bshes tshul bzung nas/ /srid par dka' ba'i dge mtsham ngom pa bzhin/ /ngo mtshar lo 'dab du mas phyug /zas gtsang sras dang chos mtshungs pa'i/ /dpal gyi yal 'dab dang po 'di/ /sa gsum dge ba'i thog mar skyes/ /de nas bgrang bya drug pa