[A:276]seng ge'i nu mas skyugs pa yi/ /chos phung brgyad khri bzhi stong snying po ni/ /theg pa gcig gis 'bras bu'i bcud du smin/ /blo mchog gser gyi bum bzang legs thogs pa'i/ /'phags yul paN grub rgya mtshos yongs su bzung / /gangs ljongs bstan 'gro'i dpal du dar ba gang / /da lta khyod kyis skyong ba'i dus la babs/ /sngon gyi thugs dam chen po ma bsnyel lam/ /'jig rten gsum gyi rin chen gcig pu de/ /phyogs 'dir nub pa'i dus shig 'ong nga re/ /myur du skyes bu chen po'i rtsal phyungs shig /ces gsungs shing gzhan yang 'di ltar bka' stsal to/ /sngon thar rtse mkhan chen thams cad mkhyen pa byams pa kun dga' bstan pa'i rgyal mtshan gyis gsang chen rdo rje theg pa'i rgyud sde rin po che rnams kyi smin grol gyi bka' ma nub pa rnams phyogs gcig tu sdud pa'i slad du dkar chag nor bu phreng mdzes zhes bya ba zhig bkod nas/ don gyis dgongs pa khyed rang la gtad yod tshod 'dug pa/ de nyid gzhir bzhag mdzad de rgyud sde bzhi dang 'brel ba'i sgrubs thabs dbang chog khrid bka' yan lag dang bcas pa/ so so'i bka' babs brgyud ldan bla ma rnams kyi yig cha khungs btsun la rtsa ba'i srog tu bzung nas/ 'thor pa rnams sdud/ gab pa rnams phyung / 'khrugs pa rnams bsdebs pa'i bka' bsdu zhig ma grub phyin/ blo dang brtson 'grus je zhan la 'gro skabs mun khang lag nyul byed pa 'dra ba zhig 'ong srid/ phal cher ming gi lhag ma tsam 'gyur nges pa lags/ sngon gyi bla ma gong ma rnams kyi gsan