[A:277]yig tu rgyun bzhugs pa 'ga' zhig /da lta mi bzhugs pa'ang mthong ba 'di ltar na/ khyed kyis brtson pa'i stobs bskyed la/ thugs rje'i shugs phyungs te bsgrubs par mdzod cig /rgyu rkyen rten 'brel gang dgos thams cad khyed la tshang 'dug pa 'di la bsams te ched du bskul ba lags so gsungs pa'i mod la/ ji ltar chu 'dzin bzhad pa'i sgra dbyangs des/ /gtsug phud can gyi rna bar rgyan pa'i tshe/ /rab tu dga' ba'i sgro gur zlum po ni/ /za 'og gur khyim rnam par bkra ba bzhin/ /gang zhig gdul bar bya ba'i sras rnams la/ /gang gis dus las yol ba med pa'i gsung / /ma bskul 'chi med rnga bzhin bsgrags pa'i tshe/ /dga' bzhin blo gros spobs pa'i lang tsho ngoms/ /thugs bskyed smon lam dus su sad pa na/ /dus su babs pa'i mdzad phrin gter gyi sgo/ /rnam par 'byed la rgyal dang rgyal ba'i sras/ /mdza' mthun grogs su sbrel ba'i tshul la ltos/ /slar 'di skad ces gsol to/ /dgongs gzhi dgos pa khyad par can de 'dra yod phyin/ kho bo'i lus srog longs spyod dang bcas pa lan grangs brgya la/ don de'i ched du gtong dgos kyang skyo dub dang zhum pa mi bgyid do/ /da dung dpal ldan bla ma chos kyi mdzod khang chen po bzhugs bzhin du/ rang gi skal ba ma thob pa'i smin grol rgyab rten gyi rgyun bzang bdud rtsi'i rdzing bu dang 'dra ba de la longs spyod chog pa'i bka' drin zhu bzhin/ ji ltar char sdod kyi bye'us char chu sgug pa ltar mchis na re 'bras yid bzhin du 'grub