[A:13]rnams kyang re re nas rnam grangs mang du gnang ba yin te/ gsung ngag cha lag dang bcas pa yongs rdzogs sum cu so gsum la sogs pa bsam gyis mi khyab bo/ /de yang e waM du rdo rje 'chang yab sras gsum gyi ring la zur chos kyi mthil len mdzad/ chos rje rgyal mtshan pa mnga' ris su lan gnyis phebs dus mkhan tshab mdzad/ me mo phag la mkhan por mnga' gsol/ stag lor steng 'gebs su lam 'bras gnang ba'i tshe thams cad kyis sku khams ngan tshul dang dogs che tshul zhus pas/ lam 'bras kyi ring la bar chad mi 'ong / de nas chos 'tshams byed gsungs shing / lam 'bras grol nas bsngo smon rgyas par mdzad cing / rje btsun rdo rje 'chang chen po kun dga' bzang po'i zhal snga nas kyi thugs dgongs yongs su rdzogs par gyur cig gsung zhing spyan chab mang du bsil lo/ /de nas tshes bdun nas shAka bzang du sku mtshams mdzad de/ de dag gi skabs su 'ja' dang me tog sogs kyi ltas/ yi dam gyi dkyil 'khor mang po'i zhal gzigs pa sogs brjod kyis mi lang / chu pho stag gi lo'i sa ga zla ba'i tshes bcu bdun gyi snga dro la mya ngan las 'das te/ dgung lo bdun cu don gnyis pa'i chu pho stag lo'i thog tu yin no/ /sku gshegs pa'i me tog gi char la sogs pa 'bab pa gzigs pas/ sngon rje sems dpa' chen po bde ba can du gshegs pa dang / slob dpon gung ru grongs pa'i dus rnams su babs pa yin par 'dug /'o cag la e babs ang gsungs/ sku rjes rnams bdag chen rdo rje 'chang blo gros rgyal mtshan gyis bka' khyab gnang / rgyas par mi nyag paN chen grags pa rdo rje sogs slob ma rnams kyis mdzad pa'i rnam thar du blta'o// //go bo rab 'byams pa bsod nams seng ge ni mdo khams 'bom gyi yul du/ yab zhang skyabs/ yum rgyal ba sman gyi sras su sa mo