[A:14]bya lor 'khrungs/ mtshan mi nyag dpal ldan du btags/ e waM chos ldan btab lo dang rje 'di 'khrungs lo gcig /dgung lo brgyad par mkhan po bsod nams 'od zer slob dpon kun dga' 'bum la rab tu byung / mtshan bsod nams seng ger btags so/ /go bo rab 'byams pa shes rab dpal ba'i drung du slob gnyer mdzad/ chos mang po gsan 'jam dbyangs kyi bsnyen pa mdzad dus mnal lam du ral gri cig phyag tu byung 'phral shubs nas phyung nam mkhar phyar bas dbus gtsang khams su khyab par snang ba byung / de dus nas go ram gyi mtshan thogs/ 'brug lo la nA lendrar byon/ rong ston dang mjal nas chos gsan/ gsang phu dang 'bras yul skyed tshal du chos thob dang slob gnyer mdzad/ dgung lo nyer drug pa khyi lor e waM chos ldan du/ rdo rje 'chang kun dga' bzang pos mkhan po/ mus chen dang rje kha char bas las gsang mdzad de bsnyen par rdzogs/ mkhan slob de dag las chos dpag tu med pa gsan/ dgung lo zhe lnga pa chu sbrul la rta nag thub bstan rnam rgyal btab/ yos lo nas lo bzhir e waM gyi gdan sa yang mdzad/ rta lor rje dkon mchog 'phel ba e waM gyi gdan sar bkod/ sa skyar chos 'khor mdzad nas/ tshur lam bya lo hor zla dang po'i nyer gcig la sngon mo rdzong du sku gshegs pur thub bstan du spyan drangs/ de'i dbyar rje dkon mchog 'phel ba thub bstan du byon nas/ rten bzhengs dang sku gdung zhugs 'bul sogs dgongs rdzogs mdzad de/ de lta bu'i kun mkhyen go ram pa 'di rje btsun grags pa'i sprul par grags/ sa skya pa'i bstan pa'i gnad la shin tu bka' drin che'o/ /rgyas par kong ston/ yig mkhan gzhon nu/ ri khrod pa kun dga' mchog ldan/ glo bo mkhan chen sogs kyis mdzad pa'i rnam thar gyi yi ger shes par bya'o// //rje rin po che dkon mchog