[A:6]bzang gis mdzad pa sogs yig cha bzang la mang ba yod pas/ de rnams su shes par bya'o/ /'di ni mang po blo la mi 'jags pa la sa bon tsam zhig mi brjed pa'i ched du'o// //dpal e waM chos ldan gyi gdan sa la/ gsum pa 'jam dbyangs shes rab rgya mtsho ni/ gtsang chu mig gi bya 'dab phyug grong du sku 'khrungs/ yab rgyal mtshan dar dang / yum lhun grub rgyal mo zer/ sras gsum 'khrungs pa las/ bdag nyid chen po 'di chung shos byi lo pa yin/ bdag chen kun rin la mtshan zhus pas bsod nams 'phel zhes pa gnang dbang byin rlabs rim par gnang zhing bstan 'dzin gyi skyes bu zhig tu 'byung bar lung bstan/ gdung ni 'gar te/ 'gar mi ye shes g.yung drung sogs kyi dbon rgyud yin/ rgya ston tsandra de wa'i drung du 'bri klog sbyangs/ dgung lo bcu bzhi pa la snar thang gi gdan sa bcu bzhi pa grub pa shes rab kyis mkhan po/ shes rab dpal bas slob dpon/ rgya ston tsandra de wa sogs kyi dbus su rab byung mdzad/ mtshan shes rab rgya mtsho grags pa dpal du gsol/ dgung lo nyi shu par sngar gyi mkhan po de nyid la slob dpon grub grags/ gsang ston dkon mchog rin chen/ spyan snga sbyin pa dpal bzang sogs kyis dge 'dun mdzad de/ bsnyen rdzogs mkhan po de nyid la chos kyang mang du gsan/ rdo rje 'chang kun dga' bzang po sogs bla ma mang du bsten/ thugs rgyud sdom pa gsum gyis gtams thos bsam bsgom pa mthar phyin/ sa skya/ snar thang sogs su grwa skor mdzad/ chos rje rgyal mchog pa la don gsal/ g.yag TIka sogs gsan/ rong ston chen po'i drung du bsnyen tshe 'jug pa gsung 'phro/ de nyid nye bar ston pa'i snod ni 'di yin te/ /de la dam pa'i don gyi bden pa bstan par bya/ /zhes pa'i thad du phebs pas rten 'brel 'grigs/ chos rje sa paN gyis rjes su bzung / tshad ma la dbang 'byor/ rigs gter gyi spyi don mdzad/