[A:511]sad pas/ 'khor ba la zhen chags dang bral ba'i dbang gis/ mi 'dod zhen can dang / chos dang gang zag la skur pa 'debs pa'i sdig pa can gzigs pa'am gsan pa tsam gyis/ phyag gis spyan dang snyan bkab nas spyan chab bsil zhing de dag la byams snying rje dpag tu med pa skyes nas ngan song las ldog pa'i thabs gzungs sngags zab mo du ma dang ma Ni sogs 'dren par mdzad/ sa phyogs gang du bla ma tshad ldan byon bzhugs dang / chos nyan bshad mdzad pa/ rten gsum bzhengs pa/ gang zag chos la 'dun pa sogs rnam dkar dge ba'i las gzigs pa'am gsan pa tsam gyis/ phyag thal mo sbyar nas rang re'ang skye ba kun tu mdzad spyod de lta bu'i rjes su slob par shog cig gsungs nas smon lam yang yang mdzad/ chos 'chad nyan sogs kyi dus rgyal sras byang chub sems dpa'i mdzad spyod/ rje bla ma gong ma'i mdzad ba rnam thar khyad par can mthong ngam thugs la dran pa'am/ gsan pa tsam gyis dad pa'i gdung shugs drag pos phyag thal mo sbyar nas spyan chab rang dbang med par bsil/ de bzhin du khams gsum 'khor ba'i sdug bsngal/ 'chi ba mi rtag pa/ las rgyu 'bras kyi nyes dmigs sogs gzhan la gsungs pa'am dran pa tsam la'ang spyan chab 'chor/ gzhan shi ba gsan pa'am nye skor du shi ba'i ro dang rus pa gos sogs gzigs pa tsam gyis spyan chab kho na mdzad/