[A:541]te/ rje 'di thugs rus shin tu che bas de nyid du rgyud chung bzhi/ snang rgyud/ dgongs rgyan/ dgongs gsal bcas thugs 'dzin dang / gzhung bdun sogs bka' dang bstan bcos rnam thar bka' 'bum dpag tu med pa zhib gzigs mdzad/ mi nyag dge rgan rig 'dzin dang / mkhas grub bstan 'dzin lhun grub sogs la gtugs te/ gzhung lugs mang po la thos bsam gyis sgro 'dogs legs par bcad/ de gar lo bzhir dges pa rdo rje la sogs pa'i yi dam chos skyong du ma'i bsnyen sgrub las gsum la chig sgril kho na mdzad do/ /de'i tshe sbyin bdag rnams kyang shin tu dad/ bsnyen bkur rgya chen po zhus/ klu sdings su 'bul skyel snga phyir ci rigs pa phul/ slar yang shar chen nas thar lam sgar du khyab bdag bstan 'dzin lhun grub kyi gdan tshab dgos tshul phebs pa bzhin/ der byon pas dpon slob thugs yid gcig tu 'dres te/ dam pa de nyid la mnga' ba'i zab chos rnams snga phyir bum pa gang byo'i tshul gsan/ gzhan yang mkhan chen sangs rgyas phun tshogs/ shar chen sangs rgyas bstan 'dzin/ khyab bdag bsod nams dpal ldan/ byams pa bsod nams bzang po/ /shar chen blo gros grags pa sogs yongs 'dzin du ma la/ zab pa dang rgya che ba'i dam pa'i chos mang du gsan pa'i tshul ni gsan yig logs su shes par bya'o/ /gsan pa'i dam tshig dang sdom pa tha dag la nyes ltung phra mos kyang ma gos par srungs shing / bsgom