[A:549]bar mdzad do/ /so drug pa lcags yos lor 'jam mgon bsod nams dpal ldan gyis bka' stsal dang len gyi sgo nas/ stod mnga' ris rab rgyas gling zhes chos dpal bzang pos btab pa/ mkhas grub du ma'i gdan sa der phebs te rten gsum gsar bzhengs/ nyams gsos/ dge 'dun gyi sde spel ba/ 'chad rtsod sogs lugs gnyis kyi sgo nas bstan 'gro'i don rgya cher mdzad cing yun ring du bzhugs/ gdan sa 'di nyid gtsos grags che'i dgon sde rnams la 'bul skyel grwal 'gyed sogs lan grangs mang du mdzad/ zhe dgu pa shing 'brug lor khri thog pa byams pa bkra shis lhun grub kyis/ gzhung sa mchod yon/ gdan sa gong bcas la bka' shog zhus nas spyan 'dren pa'i pho nya ba btang ste/ saM skr-i tar bi shwa bandhu ste sna tshogs dbyig ces pa shing mo sbrul lor/ shrI e wa~M chos ldan gyi dgon gnas 'di nyid du phebs nas 'bul ba grwa 'gyed sogs rgya chen por mdzad/ lo de'i dbyug pa nya'i yar tshes brgyad la rgyal tshab tu mnga' gsol te/ gdan sa lo lnga gnang lam 'bras tshar lnga sogs bshad sgrub kyi sgo nas rgyal ba'i bstan pa rin po che nyin mo ltar gsal bar mdzad/ bstan 'dzin gyi slob ma yang zhabs drung nam mkha' bsam 'grub/ shar pa bdag chen rin chen mi 'gyur bstan pa'i rgyal mtshan/ khang gsar dbon po bsod nams lhun grub sogs yongs su grags pa dang ma grags pa'i skyes chen bgrang las 'das pa bskrun par mdzad do/ /