[A:502]zab cing rgya che ba'i chos kyi char pa phab/ khyad par so so thar pa'i sdom pa snga phyir stsal ba bgrang ba las 'das pa/ gzhan yang byang chub sems dpa'i sems bskyed lugs gsum/ rdo rje theg pa'i dbang bskur/ zab khrid/ rjes gnang / lung man ngag sogs bsam gyis mi khyab pa'i chos kyi 'khor lo bskor nas/ skal ldan gyi gdul bya rnams rjes su bzung ba mdzad pa'i tshe/ gangs can gyi mgon po dpal sa skya pa chen po'i gdan sa gong 'og gi zhabs drung rnams kyis gtsos/ gtsang dbus kyi grub mtha' ris su ma chad pa'i mkhan slob dge ba'i bshes gnyen grags che ba phal mo che rnams dang / gzhan yang dam pa de nyid kyi zhabs pad gtsug gis len pa'i sa skyong chos kyi rgyal po du ma sogs mkhas grub kyi slob ma yongs su grags pa dang ma grags pa bgrang ba las 'das so/ /rtsod pa'i sgo nas pha rol gyi rgol ba rnams nga rgyal dang dregs pa bcom nas rje nyid kyi zhabs rdul spyi bos len pa dpag tu med pa byung zhing / rtsod chos lung rigs bzang pos 'thad sgrub kyi bstan bcos dang / mkhas btsun mang pos rang rang gi thugs bzhed ltar 'khrul pa sel ba'i dris lan dpag med/ so so'i gzhung dang mthun par bka' dang bstan bcos kyi dgongs pa phyin ci ma log pa de 'di ltar ro zhes legs par bkral nas gnang ba yang mtha' yas so/ /gzhan yang grags che'i bu slob rnams kyis bskul ba dang / khyad par du