[A:6b]gsungs ni de dag gi yul ma yin pa'i phyir/ /zhes 'byung ngo / /theg pa chen po gsang sngags kyi sdud pa po ni/ rgyud rang rang gi zhu ba pos bsdus pa yang yod la/ phal cher phyag na rdo rjes bsdus pa nyid do/ /de thams cad kyang dus dbye na 'khor lo rim pa gsum mam bzhi/ rjod byed kyis dbye na/ gsung rab yan lag bcu gnyis sam/ sde snod gsum/ brjod bya bslab pa rin po che gsum du bstan pa'i chos thams cad 'dus par gsungs la/ gsang sngags ni/ shanti pas zab mo'i don bsdus te ston pa'i phyir mdo sde'o/ /zhes dang / dpung bzang las/ gsang sngags mdo sde'i tshul du bshad kyi nyon/ /ces mdo sde'i sde snod du gsungs la/ a bhyas/ sde snod gsum ka'i don cha ldan du ston pas gsum ka'i char gtogs par bzhed do/ /de lta bu'i lung sde snod gsum 'chad nyan kyis gtan la 'bebs shing / bslab pa rin po che gsum sgrub pa nyams len gyis rgyud smin par mdzad pa de la bstan pa 'dzin pa'i gang zag zhes bya zhing / de ji srid gnas kyi bar bstan pa gnas pa zhes bya'o/ /bstan pa'i gtad lugs kyang / thub dbang nye ba 'khor dang kun dga' bo/ /sha na'i gos can nyer sbas dhi dhi ka nag po legs mthong blos mi 'bebs la sogs/ /zhes sogs gsungs pa ltar byon no/ /'di lung phran tshegs las gsungs pa/ nyan thos pa'i lugs yin kyang don la mi 'gal te/ bstan pa'i rtsa ba so so thar pa yin pas so/ /gsum pa bstan 'dzin shing rta'i srol 'byed byon pa'i tshul la gsum/ zab mo lta