[A:15a]med kyis byams pa mnyes par byas pa las byung ba/ rgya chen spyod pa'i brgyud pa'i chos ma lus par mnga' ba yang / ku sa li che ba yin no/ /zhes gsungs so/ /de'i slob ma ku sa li chung ba yin te/ byams pa kho na khyad par du sgom pas byams pa'i rnal 'byor pa zhes par yang grags la/ bla ma 'di la ku sa li che ba'i yon tan ma lus pa mnga' bas/ gser gling pa'i yang bla ma yin la/ bla ma 'dis byams snying rje byang chub kyi sems dgyer sgom rdo rje'i glu'i don yun ring du sgom zhing zhal 'don mdzad pas/ re zhig na chu bo gangga'i 'gram du bcom ldan 'das byams pa lha'i rgyal po'i cha byad du byon nas chos gsungs so/ /ku sa li chung ba'i yon tan rdzogs par mnga' ba dpal ldan a ti sha'i bla ma'i gtso bor gyur pa 'gran zla dang bral ba'i bla ma gser gling pa yin la/ de'i lo rgyus ni/ gser gling zhes pa gling bzhi gling phran brgyad gang du yang ma gtogs pa/ 'dzam bu gling dang nye ba/ rin po che sna tshogs yod pa'i gling de la gser gling zhes zer/ der res nang pa'i bstan pa/ res phyi pa'i bstan pa 'byung ba las/ de dus phyi pa'i bstan pa yod pa la gling de'i rgyal po'i sras/ rgyal bu se na zhes pa 'khrungs ma thag dkon mchog la skyabs 'gro mdzad pas/ mu stegs byed rnams kyi blo la ma ran kyang / rgyal po'i sras su song bas ci yang byed ma nus/ rgyal bu lo drug bdun lon dus nags gseb tu byon pas thub pa'i gser sku mtho gang tsam zhig rnyed pa/ de la phyag mchod 'ba' zhig mdzad pas thub pa dngos su byon te/ gser gling pa'i