[B:34b] gnyen lam dgag tu 'ong ba ngo tsha/ bdag paN chen rin po che bod du spyan 'dren du 'ongs pa yin gsungs pas/ de nas bdag po lha btsan skyab pa ba rang gis ldum ra zhig 'dug par sbra cha ther dkar nag phub nas phebs byon par mjal/ bkur sti chen po yang mdzad/ sras po bdag po tshe dbang pa ni bags 'ong zer nas mjal phrad mdzad du ma 'dod/ bdag po'i drung pa dang mjal ba'i tshe bkur sti zha phud tsam mdzad pas/ khong gi drung skor dang skye bo rnams ltad mo bltas nas rtse thang pa de pa zhud po gcig dang gda' ste/ bdag po'i drung du phyag mi 'tshal bde en mi mang zer/ 'dis mtshon nas khyim pa su che yang mi chos kyis thugs 'dzin la phyag gtan nas mi mdzad/ mi chen mi skya sus phyag phul yang phyag lan lta smos kyang ci dgos te dbu thug kyang mi gnang ba ni/ [A:81]sangs rgyas kyi bstan pa'i che ba kho na la dgongs par snang ngo / der bdag po dang mjal nas don gyi gtso bo/ grub pa'i dbang phyug paN chen rin po che bod du spyan 'dren pa'i phyir phebs pa yin/ de la rgyu rkyen ji tsam dgos sogs kyi zhu ba mdzad pas/ de rnams kyi cha rkyen thams cad kyang bdag po lha btsan skyab pas zhal gyis bzhes nas dka' gnas thams cad grol/ yon mchod shin du 'phrod par byung nas thugs bde 'bol gyis song gsung / de nas dgun nyi ldog gdong du sleb pa'i tshe/ dge ba'i bshes gnyen bdun pa zhig la zhu yig legs par phul nas bal por brdzangs/ chibs pa med par phebs mi thub pas dpon slob lngas la stod lhor sgug cing bzhugs so/ de'i zhu yig ni bod skad du bsgyur ba 'di yin te/ dpal ldan bla ma dam pa dmigs pa med pa'i thugs rje chen po can gyi zhabs kyi pad mar kum ra shri gus par phyag bgyis te zhu ba/ rje nyid sku gsung thugs bde ba chen po'i rang bzhin las g.yo ba med par