[A:131]sol bas bzhu nas gser dngul zangs lcags bton/ shing la bug pa phug nas shol dang gnya' shing bcos/ /mdzo glang dor du sdeb nas thang la thams cad btab/ /de'i gong na bod na rgal dang rin chen med/ /chos rgyal srong btsan sgam po'i sku ring la/ /bzhi ru mdzangs pa thon mi sam bho Ta/ 'jam dbyangs sprul pa skye dgu'i sgron me des/ /'gro ba'i don la dka' ba dpag med kyis/ / ka kha sum cu bod kyi gug skyed bcas/ /'dogs dang 'brel sbyar tshag dang shad kyi bcad/ /tshig gi dbye nas skabs don smra ba brtsams/ /de gang bod na klog dang yi ge med/ khri lde gtsug brtan rgyal po'i sku ring la/ /lnga ru mdzangs pa khri bzang yab don byung / /de yi thabs dang las ka ci byas na/ /bre dang srang gi 'du 'god gtsigs su bzung / /bre dang khyor gyi za ma zung du 'dzin/ /dga' gnyis tshong byed mthun gnyis las la yod/ /de gong bod na bre srang nyo tshong med/ /chos kyi rgyal po khri srong lde btsan ring / drug tu mdzangs pa khri bzang yab lhag byon/ /de'i thabs dang las ka ci byas na/ /ra khyim thams cad klung gi bde la phab/ /zhing mtha'i sgang la so nam khang khyim bcas/ /thang ma zhing du slog nas chu rnams gzhung du bcug /de'i gong na ri la mkhar khyim 'dzin/ khri srong lde btsan 'phrul rgyal sku ring la/ /bdun du mdzangs pa chen po gnyer gyi bu/ /stag tshab ldong gzigs bya ba de nyid byon/ /de'i thabs dang las ka ci byas na/ /phyogs bzhi'i srung mas sku'i rim gro byed/ /rgod kyi stong sdes so kha'i dgra la rgol/ / nang gi khod snyoms khrims kyi gsos stong bcad/ /de'i gong na bod na gsos stong med/ /mdzangs pa mi bdun byung tshul de ltar lags/ / / /