[A:163]shab stod kyi 'khon mi rnams gyes pa yin skad/ dge mthong gi sras 'khon ston bal po/ des tsha mo rong glang gi brag la/ yang phur gyi sgrub pa mdzad pas/ grub pa brnyes shing bstan ma bcu gnyis bran du 'khol ba'i nus mthu can cig byung ngo / /de'i sras shAkya blo gros kyis/ bya ru lung dang / shab stod smad du yang yun ring du bzhugs zhing sku tshe'i smad la yab mes kyi yul/ g.ya' lung mkhar thabs su byon/ de la sras gnyis kyi che ba/ 'khon rog shes rab tshul khrims ni/ yab mes kyi chos lugs la rgyud sbyangs shing / rdo rje phur pa'i grub pa brnyes nas/ mthu dang rdzu 'phrul bsam gyis mi khyab pa dang ldan zhing / gzhon nu la gzhu ston gzhon nu brtson 'grus kyi drung du/ go mi dge bsnyen mdzad shin tu btsun zhing / tshangs par spyod pas mdzes la mkhas pa dang / bzang po'i grags pa cher thob pa zhig byung ngo / /'di go mi dge bsnyen yin pas sras 'phel ba med/ de man chad 'khon rim par byon pa rnams/ pha rol tu phyin pa la sogs/ phyi mtshan nyid kyi chos rnams dang / rdo rje theg pa la gsang ba sde drug sngags snga 'gyur lnga/ phra mo nyi shu rtsa gcig la sogs pa/ gsang sngags snga 'gyur gyi chos rnams la shin du mkhas zhing / yang phur la thugs dam gyi mthil mdzad cing / grub pa ci rigs pa brnyes la/ chos skyong dkar mo nyi zla lcam sring la byed cing / nus pa thon pa sha stag byon no/ /'khon rog gi gcung po ni/ 'khon dkon mchog rgyal po zhes bya ba/ de nyid ni shing pho khyi lo la sku 'khrungs/ gzhon nu nyid nas yab dang / gcen la dbang dang gdams ngag zhus ste/ yab mes kyi chos lugs la shin tu mkhas pa byas shing / gsang sngags phyi 'gyur la spro ba yod