[A:178]yar 'brog dpon chen gyis jo mor phul ba'i ma cig mang mkhar ma kun dga' 'bum la/ bla ma dam pa kun dga' blo gros rgyal mtshan dpal bzang po pa ni/ yab dgung lo so brgyad pa sa mo phag lor 'khrungs te/ rnam thar ni bla ma 'phags pa dang tshul mtshungs shing / gong du byon pas siddhi pha la ing khyung ge gan rgyal po'i ti shri mdzad/ bstan pa'i mnga' bdag chen por gyur te/ dgung lo rtsa dgu pa me mo yos lo zla ba gnyis par/ me tog ra ba'i sde chen por zhi bar gshegs so/ /yang ma cig nam mkha' rgyal mo la sras che ba mkhas btsun chen po nam mkha' legs pa'i blo gros dpal bzang po pa ni/ yab dgung lo zhe bzhi pa shing mo sbrul lo la 'khrungs te/ mkhyen rab phun sum tshogs pa mnga' zhing / khyad par chos skyong che chung la nus pa thon par grags so/ /gong nas ku sha la go lug rgyal pos/ kon ting gu shri mtshan dang shel dam gnang / gdan sa lo bcu dgu mdzad/ dgung lo so dgu pa chu mo lug lo zla ba dgu pa'i tshes brgyad la bzhi thog gzim khang du zhi bar gshegs so/ /sras bar pa gcig gzhon nu la sku gshegs so/ /chung ba slob dpon nam mkha' rgyal mtshan dpal bzang po pa/ yab sku gshegs pa'i lo shing pho byi ba la sku 'khrungs te/ sku gzhon nu la go thub rgyal po'i bla mchod mdzad/ dgung lo nyi shu pa la pho brang dang nye bar bde bar gshegs so/ /yang ma cig kun dga' nam mkha'i rgyan la sras che ba slob dpon chen po/ kun dga' legs pa'i 'byung gnas rgyal mtshan dpal bzang po ni/ yab mes kyi chos lugs thugs su chud nas gong du byon/ ja yan du rgyal po'i ti shri mdzad/ bstan pa'i mnga' bdag chen por gyur te/ me tog ra ba'i sder zhi