[A:24]nas yang gshegs pa'i lam du/ rtswa tshong bkra shis kyis phul ba'i rtswa rdo rje gdan gyi spo la byang chub kyi shing drung du gdan la bting nas/ ji srid zag med ma thob bar/ de srid skyil krung gshig mi bya/ /gsungs nas/ srod la lha'i bu'i bdud btul/ nam gung rab mtha'i ting nge 'dzin mngon du mdzad/ tho rangs mngon par rdzogs par sangs rgyas so/ /
gsang sngags bla med pa rnams kyis byang sems kyi ting nge 'dzin gyi ngang de las 'og min du byon nas/ mngon par byang chub lnga'i stong pa nyid las byang chub pa/ gdan pad nyi las byang chub pa/ gsung yig 'bru las byang chub pa/ thugs phyag mtshan las byang chub pa/ sku yongs rdzogs las byang chub pa'o/ /gdams pa zhus ma thag tu de ltar sgom pa dang / sa bcu gcig pa/ bcu gnyis pa/ bcu gsum rdo rje 'dzin pa'i sa thob ste sangs rgyas skad/ 'di ni rdo rje gdan du sangs rgyas zer ba dang yang mi 'gal lo/ /nges par 'og min du sangs rgyas pa ni/ stug po bkod pa'i mdo las/ sangs rgyas thams cad 'og min du/ /sangs rgyas par ni ma gyur na/ /'dod khams gzugs khams rnams su ni/ /sangs rgyas par ni mi mdzad do/ /zhes bshad pa bzhin no/ /
mngon par rdzogs par sangs rgyas pa'i mdzad pa ste brgyad pa'o/ /dgu pa ni/ de ltar sangs rgyas ma thag tu/ 'dul dka' ba'i skye bos zab mo'i chos zab zhi spros bral 'od gsal 'dus ma byas/ /bdud rtsi lta bu'i chos zhig kho bos brnyes/ /su la bstan kyang go bar mi 'dug pas/ /mi smra nags kyi nang du gnas par byed/ /ces gsung nas chos ma gsungs/
go dka' la/ rang nyams su blang bar bya'o dgongs nas/ zhag bzhi bcu zhe dgu'i bar la chos ma gsungs so/ /de'i rjes lha tshangs pas chos kyi 'khor lo bskor bar gsol ba btab pas/ gnang te 'khor rnams bsdu ba'i phyir/ ghaNDi brdung ba'i sgra la/ sangs rgyas slob mar gyur pa gang su dag/