[A:26]dad pas bstod pa ni/ de yang 'di dang khyod la lan gsum du/ /thub pa khyod kyi zhabs la phyag 'tshal lo/ /thugs rje che mnga' lha yi mchod pa'i gtso/ khyod 'dra 'jig rten ma mchis lta ci smos/ /mtshan ni don grub lags zhes mngon brjod pa/ /pha dang ma yi bsam ste btags pa lags/ khyod kyi bsam rdzogs bdud rtsi brnyes pas na/ /don grub legs par nga don bdag gi 'tshal/ /zhes pas bstod cing / yab rgyal po'ang sangs rgyas kyi zhal mthong / chos thos pas zag pa las sems rnam par grol lo/ /ston pa'i zhal nas dge slong 'char kas yab rgyal po dge ba la bskul ba'i bsod nams kyi phung po de la/ gal te gzugs yod na 'jig rten gyi khams/ gang ga'i klung gi bye ma snyed du mi shong ste/ bsod nams kyi tshogs shin du rgya chen po gsungs so/ /de ltar chos 'khor rim pa gsum du bskor ba'i ring la/ lo bdun du zhag bzhi bcu zhe dgu ma tshang ba song bar byed cing / ston pa sangs rgyas nas lo bdun lon pa'i dus sum cu rtsa gsum du yum la chos gsung ba la byon/ zhag dgu bcu bzhugs pa de'i bar la/ lha tshangs pa dang / gza' khyab 'jug lha'i dbang po brgya byin gsum gyis ston pa'i sku tshab re bzhengs par gsol ba btabs pas gnang ste/ tshangs pas lha'i rin po che las chos sku'i rten/ bum pa zlum por byas pa/ dpal reg pa med pa du ba lta bu'i mchod rten bzhengs pa'i tshad tshangs pa'i mtho gang ngo / /de mkha' 'gros gdan drangs o rgyan gyi yul he ru ka'i rgyal khams na bar snang la bzhugs te/ dpa' bo mkha' 'gro mi ma yin rnams kyi mchod pa'i rten byed/ mchog gi dngos grub ster ro/ khyab 'jug gi klu'i rin po che la/ longs sku'i