[A:239]dge sgrub dbang kun dga' rgya mtsho dpon g.yog gis dad gus tshad med pa'i zhabs 'degs rgya cher zhus/ de nas tre bo'i sa cha rong pa tshar phyag phebs/ brag sdod gangs ri dkar po zhes pa'i gzhi bdag che gnyan de yis zhabs la btud de phrin las bsgrub par dam bca' phul/ khram pa gnyis kyis sgar mdzo gnyis brkus te bshas pa'i khong nas sbal sbrul mang po thon pa dang / mgon rta la pho rog gis zhon nas khram pa'i sgo drung du dngos su chas pa sogs cho 'phrul drag po du mas sna drangs te khram pa gnyis kyi khyim la me 'bar bas thal bar brlag de nas yang rim par phebs pa'i lam bar hor pa dang lcags mdud lo star gyi 'khrug pa shor bas srog chags du ma 'chi ba la thugs rje chen pos bzlum par mdzad/ a gnyan paka shis bzhengs pa'i kre'i rde'u mgon khang du rang lugs kyi srung ma dngos su bzhugs par rten gtor dang hor lcags bzlum pa'i phrin bcol gnang skabs rtags mtshan ngo mtshar bas thams cad yid ches bka' nyan pa byung / 'di skabs rdo rje nag po chen pos dngos su 'di ltar/ nga ni 'bral ba med do 'di ltar soms/ sangs rgyas bstan pa bsrung zhing dam ldan skyongs/ /dus kyi mchod gtor dag la brtson par byos/ /bar du gcod pa thams cad nga yis sel/ /